សង្គមស៊ីវិលស្នើឲ្យរដ្ឋាភិបាលបើកទូលាយសេរីភាពទទួលបានព័ត៌មាន

អង្គការសមាគមជាង ២០ បានចេញសេចក្ដីថ្លែងការណ៍រួមគ្នាមានចំណងជើងថា "យើងទាំងអស់គ្នាត្រូវការសិទ្ធិទទួលបានព័ត៌មាននិងសិទ្ធិ ជ្រើសរើស"។

រូបភាពផ្ដល់ឲ្យដោយអង្គការលីកាដូ (LICADHO)

នៅក្នុងសេចក្ដីថ្លែងការណ៍នោះ អង្គការសង្គមស៊ីវិលសូមស្វាគមន៍ចំពោះសេចក្ដីសម្រេចរបស់រដ្ឋាភិបាល ក្នុងការលុបចោលនូវវិធានការដ៏មានការភ្ញាក់ផ្អើល ដែលបានចេញកាលពីសប្ដាហ៍មុនក្នុងការត្រួតពិនិត្យចាប់ពិរុទ្ធ ប្រព័ន្ធផ្សព្វផ្សាយព័ត៌មានក្នុងស្រុកនៅប្រទេសកម្ពុជា នៅមុនការបោះឆ្នោតនេះ។
អង្គការសង្គមស៊ីវិលទាំងនេះនៅតែមានការព្រួយបារម្ភយ៉ាងខ្លាំង ពីការរឹតត្បិតដែលនៅតែមាន ដោយហាមឃាត់ទៅលើការរាយការណ៍ព័ត៌មានតាមវិទ្យុបរទេសមួយចំនួនអំពី ការបោះឆ្នោតរយៈពេល ៥ថ្ងៃមុនថ្ងៃបោះឆ្នោត។ បញ្ហានេះអង្គការសង្គមស៊ីវិលជាង ២០ នោះ បានសំណូមពរដល់រដ្ឋាភិបាលចំនួន ៤ចំណុចសំខាន់ៗ។
ទី១ សុំឲ្យលុបចោលនូវបទបញ្ជាថ្ងៃទី២១ ដែលហាមឃាត់ការរាយការណ៍ពីប្រព័ន្ធផ្សព្វផ្សាយព័ត៌មានបរទេសដែល ទាក់ទងនឹងការស្ទង់មតិ ការស្រាវជ្រាវ និងលទ្ធផលនៃការស្ទាបស្ទង់មតិអំពីការបោះឆ្នោតក្នុងរយៈពេល ៥ថ្ងៃ មុនថ្ងៃបោះឆ្នោត។
ទី២ បញ្ឈប់ការត្រួតពិនិត្យ ចាប់ពិរុទ្ធលើប្រព័ន្ធផ្សព្វផ្សាយព័ត៌មាន និងបិទប្រព័ន្ធផ្សព្វផ្សាយព័ត៌មាននៅមុន និងក្នុងថ្ងៃបោះឆ្នោតតទៅទៀត។ ទី៣ បញ្ចប់ការចេញបទបញ្ជាត្រួតពិនិត្យចាប់ពិរុទ្ធដោយផ្ទាល់ ឬប្រយោលទៅលើប្រព័ន្ធផ្សព្វផ្សាយ អ៊ីនធឺណិត រួមទាំងការបិទដោយផ្នែក ដែលត្រូវបានធ្វើឡើងដើម្បីកម្រិតការប្រើប្រាស់ប្រព័ន្ធផ្សព្វផ្សាយ ព័ត៌មានសង្គម និងគេហទំព័រ ដែលមានសេចក្ដីរាយការណ៍ព័ត៌មានរបស់បរទេស ឬសេចក្ដីរាយការណ៍ព័ត៌មានទូទៅដែលអាចប៉ះពាល់ដល់បក្សកាន់អំណាច និងទី៤ អនុញ្ញាតឲ្យបើក និងធានាឲ្យមានរយៈពេលផ្សាយតាមបណ្ដាញទូរទស្សន៍ស្មើគ្នាសម្រាប់ គ្រប់គណបក្សទាំងអស់។
អង្គការសង្គមស៊ីវិលជាង ២០ នេះ រួមមាន មជ្ឈមណ្ឌលកម្ពុជា សម្រាប់ប្រព័ន្ធផ្សាយព័ត៌មានឯករាជ្យ សម្ព័ន្ធខ្មែរជំរឿន និងការពារសិទ្ធិមនុស្សលីកាដូ សម្ព័ន្ធសហគមន៍កសិករកម្ពុជា មជ្ឈមណ្ឌលអប់រំច្បាប់សម្រាប់សហគមន៍ សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ វិទ្យាស្ថានជាតិប្រជាធិបតេយ្យសម្រាប់កិច្ចការអន្តរជាតិ (NDI) និងអង្គការមួយចំនួនផ្សេងទៀត៕
ដោយ ទីន ហ្សាការីយ៉ា
ដោយ www.rfa.org/khmer/news

Discussion

Photography

Tuesday, July 2, 2013