នាវាចម្បាំងអាមេរិកបានមកដល់ប្រទេសសិង្ហបុរីដើម្បីដាក់ពង្រាយនៅអាស៊ីអាគ្នេយ៍

នាវាចម្បាំង របស់អាមេរិកមួយគ្រឿង ដែលសំដៅដាក់ឲ្យប្រយុទ្ធនៅតាមតំបន់ឆ្នេរសមុទ្របានមកដល់ប្រទេស សិង្ហបុរីកាលពីថ្ងៃព្រហស្បតិ៍ទី១៨ ខែមេសា ដើម្បីដាក់ពង្រាយនៅអាស៊ីអាគ្នេយ៍ និងបានគូសបញ្ជាក់អំពីការផ្ដោតការយកចិត្តទុកដាក់ខាងយុទ្ធសាស្ត្រ ថ្មីរបស់ប្រធានាធិបតីបារ៉ាក់ អូបាម៉ានៅអាស៊ី។

ការដាក់ពង្រាយនាវាUSS Freedom បាន កើតឡើងក្នុងពេលដែលភាពតានតឹងកើនឡើងនៅឧបទ្វីបកូរ៉េ និងនៅពេលដែលចិនបានដំឡើងសាច់ដុំនាវារបស់ខ្លួននៅសមុទ្រចិន ខាងត្បូង ជាកន្លែងដែលចិនមានការប្រកួតប្រជែងទាមទារទឹកដីជាមួយប្រទេសនៅ អាស៊ីអាគ្នេយ៍មួយចំនួន។

មន្ត្រីកងទ័ពជើងទឹករបស់អាមេរិកបាននិយាយថា នាវាចម្បាំងFreedom ជាប្រភេទនាវាថ្មី ដែលគេហៅថា នាវាប្រយុទ្ធនៅតាមឆ្នេរសមុទ្រ(LCS) បានបើកទៅកាន់មូលដ្ឋានកងទ័ពជើងទឹក Changi នៅវេលាម៉ោង១១ព្រឹក (ម៉ោងនៅសិង្ហបុរី) ដែលជាសម្ព័ន្ធមិត្តដ៏យូរលង់របស់អាមេរិក ដែលបានជួយខាងភស្តុភារ និងការធ្វើលំហាត់យោធា នៅអាស៊ីអាគ្នេយ៍។

នាវានេះជានាវាLCSលើកដំបូង របស់កងទ័ពជើងទឹកអាមេរិកដែលសំដៅធ្វើការប្រយុទ្ធនៅជិតៗឆ្នេរសមុទ្រ នឹងត្រូវបានដាក់ពង្រាយរយៈពេល៨ខែ នៅក្នុងតំបន់នេះ ហើយនិងចូលរួមនៅក្នុងការធ្វើសមយុទ្ធខាងនាវា ព្រមទាំងនៅទស្សនាកំពង់ផែផ្សេងៗទៀត។ ជំនាញការខាងសន្តិសុខតំបន់លោក អ៊ាន ស្ទ័ររី បាននិយាយថា ការដាក់ពង្រាយនាវាFreedom បាន បង្ហាញអំពីការសន្យារបស់ក្រុងវ៉ាស៊ីងតោនដើម្បីធានាសេរីភាព នៃការធ្វើនាវាចរនៅក្នុងតំបន់ ដែលបម្រើឲ្យខ្សែដឹកជញ្ជូនតាមនាវា ដ៏រវល់បំផុតនៅលើពិភពលោក។

លោកស្ទ័ររីបានបន្តទៀតថា«វា បានបង្ហាញចំពោះសម្ព័ន្ធមិត្ត និងមិត្តភក្ដិអាមេរិកថា បានសន្យាដើម្បីរក្សាវត្តមានដ៏ខ្លាំងនៅក្នុងតំបន់ដើម្បីធានា ស្ថិរភាព។ នៅក្នុងក្របខ័ណ្ឌនាវាក៏គូសបញ្ជាក់នូវការគាំទ្រការសន្យារបស់ អាមេរិក ដើម្បីធានាសេរីភាព នៃការធ្វើនាវាចរ»។

លោក ស្ទ័ររីបន្ថែមថា ការដាក់ពង្រាយនៅពេលខាងមុខនេះ នូវនាវាទាំងនេះគឺជាផ្នែកមួយនៃការវិលរបស់អាមេរិកក្នុងការធ្វើ ឲ្យមានតុល្យភាពឡើងវិញ ចេញពីអ៊ីរ៉ាក់ និងអាហ្វហ្គានីស្ថានឆ្ពោះមកកាន់អាស៊ី។

រដ្ឋមន្ត្រី ការពារប្រទេសលោក ឡេអន ប៉ាណេតា បានប្រកាសកាលពីឆ្នាំកន្លងមកថា ក្រុងវ៉ាស៊ីងតោននឹងប្ដូរកងនាវារបស់ខ្លួនទៅកាន់តំបន់ ប៉ាស៊ីហ្វិកនៅក្នុងឆ្នាំ២០២០ ដែលជាផ្នែកនៃការផ្ដោតការយកចិត្តទុកដាក់ខាងយុទ្ធសាស្ត្រថ្មីនៅ អាស៊ី ដែលចិនគឺជាមហាអំណាចមួយ ដែលកំពុងងើបឡើងនោះ៕ប្រភពពី កម្ពុជាថ្មី

Discussion

Photography

Saturday, April 20, 2013