កម្ពុជាចេញដំណើរទៅតុលាការឡាអេជាមួយក្តីសង្ឃឹម

លោកឧបនាយករដ្ឋមន្ត្រី ហោ ណាំហុង ធ្វើសន្និសីទកាសែត ថ្ងៃទី ៩ មេសា

លោកឧបនាយករដ្ឋមន្ត្រីហោ ណាំហុង បានដឹកនាំប្រតិភូអ្នកច្បាប់កម្ពុជាចេញទៅតុលាការយុត្តិធម៌ អន្តរជាតិនៃទីក្រុងឡាអេហើយកាលលពីយប់ថ្ងៃអង្គារម្សិលមិញ។ នៅមុនឡើងយន្តហោះពីព្រលានយន្តហោះអន្តរជាតិភ្នំពេញ លោករដ្ឋមន្ត្រីការបរទេសកម្ពុជាបានអះអាងយ៉ាងមុតមាំថា លោកមានសុទិដ្ឋិនិយមចំពោះរឿងក្តីប្រាសាទព្រះវិហារនេះ។

ប្រសិនបើលោកប្រមុខការទូតកម្ពុជាមានសុទិដ្ឋិនិយមចំពោះសំណុំរឿង បកស្រាយសាលក្រម ស្តីពីប្រាសាទព្រះវិហារ គឺក៏ព្រោះតែ កម្ពុជាមានមូលហេតុច្បាស់លាស់របស់ខ្លួន។ មូលហេតុដែលជំរុញអោយតុលាការអន្តរជាតិរបស់អង្គការសហប្រជាជាតិមួយនេះ ត្រូវតែបកស្រាយឡើងវិញ សាលក្រមរបស់ខ្លួន ហើយដែលនេះគឺជាករណីដ៏កម្របំផុត។

កម្ពុជាត្រូវការអោយតុលាការយុត្តិធម៌អន្តរជាតិបកស្រាយសាលក្រមនេះ ដើម្បីប្រាប់ពិភពលោកឡើងវិញ ពិសេសប្រាប់ភាគីថៃ អំពីភាពជាម្ចាស់កម្មសិទ្ធិនៃតំបន់ប្រាសាទព្រះវិហារ ដែលជាបេតិកភណ្ឌរបស់មនុស្សជាតិ។ បើតាមការបញ្ជាក់របស់លោកឧបនាយករដ្ឋមន្ត្រីនៅក្នុងសន្និសីទកាសែត មុនការចាកចេញពីកម្ពុជាកាលពីយប់ថ្ងៃអង្គារទី៩មេសា កម្ពុជាក៏មានក្តីសង្ឃឹមថា លទ្ធផលនៃការបកស្រាយរបស់តុលាការយុត្តិធម៌អន្តរជាតិនៅប្រទេសហូឡង់ នោះ នឹងផ្តល់ភាពត្រឹមត្រូវមកអោយកម្ពុជា។

ចំពោះលោកឧបនាយករដ្ឋមន្ត្រី អង្គហេតុ និងអង្គច្បាប់សុទ្ធតែបានបញ្ជាក់អំពីភាពជាម្ចាស់របស់កម្ពុជាលើ តំបន់ប្រាសាទប្រាសាទព្រះវិហារ។ អង្គហេតុ និងអង្គច្បាប់ដែលបានស្តែងចេញតាមរយៈសាលក្រមឆ្នាំ១៩៦២រួចទៅហើយ។

លោកហោ ណាំហុងបានពន្យល់ផងដែរអំពីមូលហេតុមួយចំនួនដែលធ្វើអោយកម្ពុជា ត្រូវស្នើអោយតុលាការទីក្រុងឡាអេបកស្រាយសាលក្រមឆ្នាំ១៩៦២នោះ។ នោះគឺដោយសារតែការទាមទាររបស់រដ្ឋាភិបាលថៃក្រោមអាណត្តិរបស់លោក អាប់ភីស៊ីត វេចាជីវ៉ា កាន់កាប់តំបន់ជុំវិញប្រាសាទព្រះវិហារទំហំ៤,៦គម និងការកាន់កាប់របស់យោធាថៃនៅក្នុងតំបន់ភ្នំទ្រព្យជាដើម។

គួរបញ្ជាក់ថាប្រតិភូអ្នកជំនាញ និងអ្នកច្បាប់តំណាងប្រទេសកម្ពុជានៅតុលាការយុត្តិធម៌អន្តរជាតិមាន ជាង១០រូបដែលដឹកនាំដោយលោកឧបនាយករដ្ឋមន្ត្រីហោ ណាំហុង រដ្ឋមន្ត្រីការបរទេស។ សមាភាពប្រតិភូរួមមាន លោកប្រមុខការទូតកម្ពុជា លោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន លោកឡុង វិសាឡូ រដ្ឋលេខាធិការក្រសួងការបរទេស មេធាវីបរទេស៣រូបមកពីបារាំង អាមេរិក និងអង់គ្លេសព្រមទាំងជំនួយការច្បាប់របស់ពួកគេ។

សវនាការផ្ទាល់មាត់ជាសាធារណៈ ហើយដែលនឹងត្រូវផ្សាយផ្ទាល់តាមគេហទំព័ររបស់តុលាការយុត្តិធម៌ អន្តរជាតិផងនោះ នឹងចាប់ផ្តើមនៅព្រឹកថ្ងៃទី១៥ ជាមួយការធ្វើសក្ខីកម្មរបស់ភាគីកម្ពុជាតែម្តង។ ពីថ្ងៃទី១៥ដល់ថ្ងៃទី១៩មេសាសប្តាហ៍ក្រោយនេះ កម្ពុជានិងថៃត្រូវតតាំងគ្នាចំនួន២ជុំ ក្នុងដំណើរការសវនាការ។ តាមនីតិវិធី លទ្ធផលនៃក្តីក្តាំនេះនឹងត្រូវប្រកាសនៅចុងឆ្នាំ២០១៣នេះ៕ ប្រភពពី (RFI)

Discussion

Photography

Wednesday, April 10, 2013