ពុំមានអ្នកទទួលខុសត្រូវ ករណីកាប់ឈើ ១៦.០០០ ដើម ក្នុងដែនជម្រកសត្វព្រៃ លំផាត់ លើផ្ទៃដី ១៥ គីឡូម៉ែត្រការ៉េ

មន្ដ្រីអង្គការ ក្រៅរដ្ឋាភិបាល និងប្រជាពលរដ្ឋរួមជាមួយ អាជ្ញាធរ មូលដ្ឋានបាននាំគ្នាចុះល្បាតតាមព្រៃ ហើយបានប្រទះឃើញឈើហុបជាង ១៦.០០០ដើមនៅក្នុងដែនជម្រកសត្វ ព្រៃលំផាត់ស្ថិតក្នុងស្រុកកូនមុំត្រូវបានគេកាប់បំផ្លាញនិងបាន ដឹកចូលទៅក្នុងក្រុមហ៊ុនដីសម្បទានសេដ្ឋកិច្ចរបស់វៀតណាម និងចិនដែលមានទីតាំងនៅក្បែរនោះ ហើយក្រោយពេលបែកធ្លាយរឿងនេះ មិនទាន់ឃើញមានចំណាត់ការទៅលើបន្ត្រីជំនាញនិងសមត្ថកិច្ចនាមួយចំនួនទៅ ដាក់ពិន័យនៅឡើយទេ ។
ប្រជាពលរដ្ឋបានឱ្យដឹងថា តំបន់ព្រៃ នោះពួកគាត់តែងតែនាំគ្នាចូលព្រៃស្វែងរកអនុផលព្រៃឈើដូចជា ដងជ័រទឹកជា ដើម ហើយក៏ប្រទះឃើញឈើហុបប្រមាណ ជាង១៦.០០០ដើមដែលត្រូវបានគេ កាប់បំផ្លាញនៅលើផ្ទៃដីប្រមាណ១៥ គីឡូម៉ែត្រក្រឡា ។ ប្រជាពលរដ្ឋបានបន្ដ ថា ឈើហុបដែលគេកាប់បំផ្លាញនោះមាន មុខកាត់ចាប់ពីកន្លះម៉ែត្រឡើងទៅមានដូចជា គគីរ, ឈើទាល, ត្រាច, ផ្ដៀក និងសុក្រំ ហើយគេអាចប៉ាន់ប្រមាណដឹងថា សកម្មភាពកាប់បំផ្លាញដើមឈើនៅក្នុងដែនជម្រកសត្វនោះ ធ្វើឡើងដោយគ្មានការក្រែងញញើតអ្វីឡើយ។
ប្រជាពលរដ្ឋបានបញ្ជាក់ទៀតថា ក្រុមឈ្មួញបានដណ្ដើមគ្នាកាប់ឈើ និង ដឹកឈើតាមឡានពី២០ទៅ៣០គ្រឿង ចូលទៅក្នុងក្រុមហ៊ុនសម្បទានសេដ្ឋកិច្ច របស់ចិន និងវៀតណាមក្នុងមួយថ្ងៃៗ ហើយការដឹកជញ្ជូនឈើធ្វើឡើងទាំង យប់ទាំងថ្ងៃលាន់ឮកងរំពងពេញព្រៃ ។ បន្ទាប់ពីប្រជាពលរដ្ឋបានប្រទះឃើញ ដើមឈើដែលត្រូវកាប់បំផ្លាញទ្រង់ទ្រាយ ធំក្នុងដែនជម្រកសត្វព្រៃលំផាត់មកមានដំណឹងថាក្រុមឈ្មួញបានផ្អាក សកម្មភាព ជាបណ្ដោះអាសន្ន ហើយគំនរឈើមួយ ចំនួនត្រូវបានដឹកជញ្ជូនចូលទៅក្នុងបរិ វេណរបស់ក្រុមហ៊ុនអស់ទៅហើយ ។
ប្រជាពលរដ្ឋនិងមន្ដ្រីអាជ្ញាធរឃុំ ស្រែអង្គ្រង ស្រុកកូនមុំ ខេត្ដរតនគិរី អំពាវនាវសុំឱ្យអាជ្ញាធរខេត្ដចាត់វិធានការទប់ស្កាត់ជាបន្ទាន់ សកម្មភាពកាប់ ឈើអនាធិបតេយ្យនៅក្នុងដែនជម្រក សត្វព្រៃលំផាត់ ។ ប្រជាពលរដ្ឋដែលបានឃើញហេតុ ការណ៍ផ្ទាល់សុំមិនឱ្យបញ្ចេញឈ្មោះបាន ឱ្យដឹងថា ម៉ាស៊ីនកាត់ឈើស្វ័យប្រវត្ដិ រាប់សិបគ្រឿងអមដោយកម្មករស៊ីឈ្នួលច្រើនក្រុមក្នុងនោះក៏មានក្រុម ប្រដាប់ អាវុធ និងមន្ដ្រីការពារដែនជម្រកសត្វ ព្រៃប្រើប្រាស់រថយន្ដច្នៃស្ទូចឈើដែល គេនិយមហៅថា ឡានរ៉េវ អាររំលំឈើ មូលដឹកជញ្ជូនចូលរោងអារឈើនៅក្នុង ដែនជម្រកសត្វព្រៃហើយអារច្រៀកនាំ ចេញចាប់តាំងពីដើមឆ្នាំ២០១៣រហូតបច្ចុប្បន្ន ។
ប្រជាពលរដ្ឋឃើញហេតុការណ៍ដដែល បន្ដថា ក្រុមហ៊ុនពាក់ព័ន្ធកាប់ឈើនេះ មានក្រុមហ៊ុនហងអាញ់លំផាត់, ក្រុមហ៊ុន វិនម៉ាដេត និងក្រុមកម្មករឧកញ៉ាថៃ។ ប្រភពនិយាយថា “គេយកឈើផ្ដៀក, ឈើទាលចាប់ពីមុខ៥០ឡើងដល់មុខ ១០០, ១២០, ១៥០ឡើង គេយកទាំង អស់ ។ ត្រង់សឺន័រប្រហែល២៥គ្រឿង ចូលកាត់ឈើហ្នឹង ។ គេថាឧកញ៉ាថៃ ។ អ្នកដែលចុះមកប្អូនឧកញ៉ាថាគេចុះមកមើលកូនចៅកាប់ឈើ ។ ខ្ញុំឃើញកាំ ភ្លើងហ្នឹង២ដើម អាមួយកាំភ្លើងស្វាយ បត់ អាមួយកាំភ្លើងវែងមិនដឹងកាំភ្លើង ស្អីគេមើលកូនចៅធ្វើស្ពាន គេកាត់គេ ដឹកស្អីហ្នឹងណា” ។
ប្រជាពលរដ្ឋរស់នៅឃុំស្រែអង្គ្រង ស្រុកកូនមុំ ខេត្ដរតនគិរី អ្នកប្រកបរបរ ផលិតជ័រទឹកពីដើមឈើក្នុងព្រៃជម្រក សត្វព្រៃលំផាត់ប្រមាណ២០គ្រួសារឱ្យ ដឹងថា ពួកអ្នកកាប់ឈើបានបង់ប្រាក់ទៅ ឱ្យប្រជាពលរដ្ឋម្ចាស់ដើមឈើផលិតជ័រ ឬដើមច្បោះណាដែលបានទៅទាន់ឃើញសកម្មភាពកាប់ដើមឈើរបស់អ្នកភូមិ ក្នុងមួយដើម៨ពាន់រៀល ។ ប្រជាពលរដ្ឋ ទាំងនោះឱ្យដឹងថា ដើមច្បោះអ្នកភូមិ រួមទាំងឈើមូលមានតម្លៃផ្សេងទៀត រាប់ម៉ឺនដើមនៅចំណុចគុម្ពោតដាច់អន្លង់ ទូក, គុម្ពោតឃ្លៃលើ, គុម្ពោតតានវ៉ាន, អូរខ្សាច់, គុម្ពោតឈើធំ ក្នុងដែនជម្រក សត្វព្រៃត្រូវបានកាប់យកអស់គ្មានសល់ និងកំពុងបន្ដអាររំលំឈើទ្រហឹងពេញព្រៃរហូតបច្ចុប្បន្ន ។
មន្ដ្រីខេត្ដមួយរូបសុំមិនបញ្ចេញឈ្មោះ ទទួលស្គាល់ថា ពិតជាមានករណីកាប់យក ឈើពីក្នុងដែនជម្រកសត្វក្រៅតំបន់ដី សម្បទានសេដ្ឋកិច្ចក្រុមហ៊ុននោះមែន ។ មន្ដ្រីជំនាញដដែលឱ្យដឹងថា មន្ដ្រីបរិស្ថាន ការពារដែនជម្រកសត្វព្រៃបានដឹងនិងចូល រួមសកម្មភាពកាប់ឈើមូលនេះទៀតផង។
ប្រជាពលរដ្ឋក៏បានបញ្ជាក់ផងដែរថា គេឃើញជនជាតិវៀតណាមដើរប្រមូលឈើដែលបានកាប់នោះដឹកជញ្ជូនចូល ទៅក្នុងក្រុមហ៊ុនសម្បទានរបស់វៀត ណាមមួយកន្លែងឈ្មោះក្រុមហ៊ុនហុងអាញ់ អណ្ដូងមាស ហើយជនជាតិវៀតណាម អស់ទាំងនោះមិនចេះភាសាខ្មែរមួយម៉ាត់ ដែលមិនអាចនិយាយទាក់ទងគ្នាបាន ប៉ុន្ដែ ពួកគេបានធ្វើសកម្មភាពកាប់បំផ្លាញ ព្រៃឈើនិងដឹកជញ្ជូនឈើក្នុងដែនជម្រកសត្វព្រៃលំផាត់មិនដែលក្រែង ញញើតអ្វីឡើយ ។ មន្ដ្រីមួយចំនួនមិនហ៊ាននិយាយ រឿងពិតពីភាពអនាធិបតេយ្យនៃការ កាប់បំផ្លាញព្រៃឈើក្នុងដែនជម្រកសត្វ ព្រៃលំផាត់នោះទេ ។
បើយោងតាមអនុក្រឹត្យគឺក្រុមហ៊ុនហុងអាញ អណ្ដូងមាសទទួលបានដីសម្ប ទានសេដ្ឋកិច្ចពីរដ្ឋាភិបាលទំហំ៩.៧៨៥ហិកតាកាលពីឆ្នាំ២០១១ ហើយសកម្ម ភាពរបស់ក្រុមហ៊ុននេះគ្មានអ្វីជាដុំកំភួននោះទេ។ រីឯតំបន់ជម្រកសត្វព្រៃ លំផាត់ស្ថិតនៅព្រំប្រទល់ខេត្ដរតនគិរី មណ្ឌលគិរី និងខេត្ដស្ទឹងត្រែង ដែលមាន ទំហំប្រមាណ២.៥០០គីឡូម៉ែត្រការ៉េ ៕ប្រភពពី សារពត៍មាន សេរី

កាប់ឈើ១៦.០០០ដើម ក្នុងដែនជម្រកសត្វព្រៃលំផាត់ពុំមានអ្នកទទួលខុសត្រូវ

Discussion

Photography

Tuesday, April 30, 2013