ធ្វើយ៉ាងណាទើបអាចជម្នះភាពភ័យខ្លាចបាន?

សហគ្រិន ជាប្រភេទមនុស្សដែលហ៊ានប្រថុយនឹងគ្រោះថ្នាក់ ដើម្បីជោគជ័យទៅលើកិច្ចការដែលពួកគេធ្វើ។ ប៉ុន្តែមិនមែនមនុស្សគ្រប់រូបសុទ្ធតែមានគំនិតជា សហគ្រិន ហ៊ាន ជម្នះភាពភ័យខ្លាចរបស់ខ្លួនបានទាំងអស់គ្នាទេ។ សូម្បីតែថ្នាក់ដឹកនាំល្បីៗនៅពេលខ្លះក៏រួញរា ស្ទាក់ស្ទើរនឹងធ្វើការសម្រេចចិត្តលើការងារមួយចំនួនដែរ។ ប៉ុន្តែអ្វីដែលល្អគឺថា អ្នកអាចបង្វឹកខ្លួនឯងឲ្យជម្នះភាពភ័យខ្លាចបាន។ បើបាន តើតាមវិធីណា? ខាងក្រោម ជាគន្លឹះបីយ៉ាងដែលអាចជួយអ្នកបាន៖

១. កុំផ្ដោតទៅលើគុណសម្បត្តិ និងគុណវិបត្តិពេក

នៅ ពេលដែលអ្នកប្រថុយធ្វើអ្វីមួយ ចំណុចដែលត្រូវគឺការស្រាវជ្រាវបន្តិច និងប្រតិកម្មដ៏អង់អាចរបស់អ្នកក្នុងការសម្រេចចិត្ត។ ការផ្ដោតខ្លាំងទៅលើគុណសម្បត្តិ និងគុណវិបត្តិច្រើនពេកនឹងធ្វើឲ្យអ្នករារែក ភ័យខ្លាចបរាជ័យ និងបាត់បង់ជំនឿចិត្ត។ នេះគឺជាសម្ដីរបស់ Monica Mehta អ្នកនិពន្ធសៀវភៅ”សភាវគតិសហគ្រិន” ឬ the Entrepreneurial Instinct។ ប្រសិនបើខ្លួនអ្នកប្រាប់ថា អាចធ្វើបាន ចូរចាប់ផ្ដើមធ្វើវាភ្លាម រួចសឹមសម្របសម្រួលតាមកាលៈទេសៈ។ នេះមិនមែនមានន័យថា អ្នកមិនប្រុងប្រយ័ត្ននោះទេ ប៉ុន្តែការចាប់ផ្ដើមកាន់តែឆាប់ អ្នកអាចកាត់បន្ថយភាពភ័យខ្លាចកាន់តែច្រើន។

២. កំណត់គោលដៅតូចៗឲ្យបានច្រើន

ដើម្បី ឲ្យសមទៅនឹងការប្រឈម ជាដំបូងត្រូវចាប់ផ្ដើមបង្កើតគោលដៅតូចៗដែលអ្នកអាចទៅដល់។ គោលដៅតូចៗទាំងនោះអាចមានលក្ខណៈប្រថុយប្រថានផងដែរ។ គោលបំណងនៃការធ្វើបែបនេះគឺដើម្បីឲ្យអ្នកទទួលបទពិសោធន៍ជោគជ័យ បន្តបន្ទាប់គ្នា។ ជោគជ័យជំហានដំបូងទាំងនោះនឹងជំរុញចិត្តអ្នក ឲ្យសាកល្បងរកការប្រឈមធំជាងមុន។ “រៀងរាល់ពេលយើងសម្រេចជោគជ័យ ខួរក្បាលរបស់យើងនឹងបញ្ចេញដូផាមីន ដែលជំរុញចិត្តយើងឲ្យត្រឡប់ក្រោយ និងបន្តរកជោគជ័យថ្មីទៀត។” នេះជាការលើកឡើងរបស់ Mehta។ ដូច្នេះប្រសិនបើអ្នកជួបនឹងការប្រថុយប្រថានធំ អ្នកនឹងហ៊ានធ្វើសកម្មភាពគ្រប់បែបយ៉ាងដើម្បីជម្នះជាជាង ភ័យខ្លាចបរាជ័យ។

៣. ព្យាយាមហ៊ុមព័ទ្ធខ្លួនអ្នកនឹងមនុស្សដែលចូលចិត្តប្រថុយប្រថាន

ផ្នែក ធំបំផុតនៃការសម្របខ្លួនឲ្យសមនឹងការប្រថុយប្រថានគឺ ការប្រឡូកផ្ទាល់។ ប្រសិនបើមនុស្សជុំវិញអ្នកជាមនុស្សដែលហ៊ានប្រថុយនឹង គ្រោះថ្នាក់ នោះអ្នកនឹងចាប់ផ្ដើមធ្វើដូចគ្នា។ អ្នកចូលចិត្តប្រឈមនឹងគ្រោះថ្នាក់ទំនងជានឹងលើកទឹកចិត្តអ្នក ឲ្យអ្នកសាកល្បងធ្វើវាដោយខ្លួនអ្នក។ អ្នកអាចក្រឡេកមើលប្រវត្តិរបស់ជនល្បីឈ្មោះបាន។ ភាគច្រើននៃជោគជ័យអ្នកទាំងនោះកើតចេញពីការហ៊ានប្រឈមនឹង គ្រោះថ្នាក់ និងបរាជ័យច្រើនលើច្រើនសារ។

សាកល្បងចំណុចទាំងបីខាងលើដោយខ្លួនអ្នក ហើយចាំមើលថា តើអ្នកអាចជម្នះភាពភ័យខ្លាចរបស់អ្នកបានកម្រិតណា?

ប្រែសម្រួល៖ Zac
ប្រភព៖ Entrepreneur សប្បាយ

Discussion

Photography

Wednesday, May 8, 2013