កាសែត ជាប្រព័ន្ធផ្សព្វផ្សាយដែលមានប្រវត្ដិរាប់រយឆ្នាំមកហើយនៅតែដើរ តួនាទីមួយយ៉ាងសំខាន់ក្នុងការផ្តល់ព័ត៌មានទៅដល់ប្រជាពលរដ្ឋ គ្រប់ស្រទាប់វណ្ណៈទាំងក្នុងប្រទេសនិងក្រៅប្រទេស។
តើកាសែត មានគុណសម្បត្តិអ្វីខ្លះដែលជួយឲ្យសារព័ត៌មានក្រដាសមួយនេះត្រូវ បានផ្តល់តម្លៃពីសង្គមក្នុងសម័យកាលទំនើបយ៉ាងដូច្នេះ?
ក្នុងនាមជាអ្នកនិយមអានព័ត៌មានដែលបានចុះផ្សាយលើអនឡាញប្រចាំ ថ្ងៃ យុវជន ទេព សូនី ដែលជានិស្សិតផ្នែកអក្សរសាស្រ្តមួយរូបបានឲ្យដឹងថា៖ «ខ្ញុំចាប់ផ្តើមអានកាសែតយូរហើយ។ ខ្ញុំចូលចិត្តអានព័ត៌មានលើកាសែតដោយសារតែរាល់អត្ថបទរបស់កាសែត ត្រូវបានសរសេរច្បាស់លាស់ជាងព័ត៌មានតាមអនឡាញ។
ឧទាហរណ៍រឿងបាតុកម្មរបស់ លោក ជុំ ម៉ី កាសែតសរសេរមកច្បាស់លាស់ ប៉ុន្តែគេហទំព័រវិញសរសេរបានតែពាក់កណ្តាលប៉ុណ្ណោះ»។
យុវជនរូបនេះបានបញ្ជាក់ថា ថ្វីដ្បិតតែអនឡាញអាចផ្សព្វផ្សាយព័ត៌មានបានរហ័សយ៉ាងណាក៏ដោយ លោកនៅតែរង់ចាំអានអត្ថបទព័ត៌មានដែលបានចុះផ្សាយតាមកាសែតដើម្បី ទទួលបានព័ត៌មានលម្អិត និងកាន់តែច្បាស់ដែរ។
ចំណែកឯលោក ស៊ុន សារឿន អាយុ៤២ឆ្នាំ ជាអ្នករត់រ៉ឺម៉កកង់បីដែលមិនធ្លាប់បានប្រើអ៊ីនធឺណិត បានប្រាប់ថា៖ «ខ្ញុំចូលចិត្ដអានកាសែតនៅពេលទំនេរហើយប្រសិនបើមានរឿងអ្វី ប្លែកទាក់ទងនឹងព័ត៌មានកីឡា ខ្ញុំតែងតែតាមដានវាជានិច្ច»។
ពាក់ព័ន្ធនឹងការតាមដានព័ត៌មានរបស់ប្រជាពរដ្ឋនេះ លោក មឿន ឈានណារិទ្ធ ដែលជានាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មានបាន លើកឡើងថា៖ «ពេលខ្លះ អត្ថបទតាមអនឡាញដែលផ្សាយលឿនពេក អាចមានកំហុសលើព័ត៌មាន ពីព្រោះវាមិនត្រូវបានផ្ទៀងផ្ទាត់នៅឡើយ។ ប៉ុន្ដែព័ត៌មានកាសែតភាគច្រើនតែងតែបានផ្ទៀងផ្ទាត់ហ្មត់ចត់ ពីព្រោះវាបានចំណាយពេលយូរមុននឹងចូលរោងពុម្ភ»។
ជាមួយគ្នានេះដែរ លោកបានបញ្ចេញគំនិតទាក់ទងទៅនឹងសារព័ត៌មានកាសែតនិងអនឡាញថា សម្រាប់ព័ត៌មានតាមអនឡាញនៅពេលនេះ វាមានសារៈសំខាន់ណាស់។ ថ្វីដ្បិតតែការចែកព័ត៌មានលឿនជ្រុលពេកដែលងាយបង្កើតកំហុសក៏ដោយ ប៉ុន្តែវាអាចប្រកួតប្រជែងជាមួយនឹងប្រព័ន្ធផ្សព្វផ្សាយដទៃទៀត ដូចជាវិទ្យុនិងទូរទស្សន៍។
លោកបន្ដថា សម្រាប់អ្នកអានព័ត៌មាននៅលើអនឡាញពួកគាត់គួរតែគិតមើលថាតើ គេហទំព័រមួយណាដែលអាចទុកចិត្តបាន ហើយបើគាត់ជាអ្នកចូលចិត្តអានព័ត៌មាន គាត់ប្រាកដជាដឹងច្បាស់។
ការពិត ថ្វីដ្បិតតែព័ត៌មាននៅលើអនឡាញ ត្រូវបានចែកចាយយ៉ាងច្រើនលើសលប់ នៅលើប្រព័ន្ធអ៊ីនធឺណិត ប៉ុន្តែក្នុងករណីមួយចំនួនតូច វាក៏មានកំហុសខុសឆ្គងនូវទិន្នន័យដែរ ដោយសារតែគេហទំព័រព័ត៌មាននោះផ្សព្វផ្សាយព័ត៌មានលឿនពេក។
ជាក់ស្តែង ករណីគ្រោះថ្នាក់ចរាចរណ៍របស់លោក ខេមរៈ សេរីមន្ត ដែលមានការផ្សព្វផ្សាយខុសពីអត្តសញ្ញាណអ្នកស្លាប់។ ក្រៅពីនេះ ក៏មានករណីបាក់ពិតានអគាររោងចក្រមួយនៅខេត្តកំពង់ស្ពឺ ដែលបានបង្ហាញពីទិន្នន័យខុសនៃការស្លាប់កម្មកររោងចក្រ។
ពាក់ព័ន្ធនឹងចម្ងល់ថា តើហេតុអ្វីបានកាសែតនៅតែពេញនិយមលោក ងួន សេរ័ត្ន ជាការីនិពន្ធផ្នែកនយោបាយនៃកាសែតរស្មីកម្ពុជា បានបង្ហាញពីទស្សនៈរបស់ខ្លួនថា៖ «ដើម្បីឈរជើងនឹងនៅក្នុងទីផ្សារ យើងត្រូវផ្តល់ព័ត៌មាន ឬដំណឹងដែលបម្រើសេចក្តីត្រូវការដល់មហាជនភាគច្រើន ប្រកបដោយលក្ខណៈសម្បូរបែប ទាក់ទាញ និងស៊ីជម្រៅជាងអនឡាញ។ ប៉ុន្ដែមកដល់ពេលនេះ ពុំទាន់មានការគំរាមគំហែងជាក់ស្តែងមកលើសារព័ត៌មានបោះពុម្ពនៅឡើយ ទេ»។
លោក សេរ័ត្ន បានបង្ហាញពីគំនិតសុទិដ្ឋិនិយមរបស់ខ្លួនថា ដោយសារតែមានការជឿជាក់ទៅលើគុណភាពព័ត៌មានក្នុងផ្នែកបោះពុម្ព ការជឿទុកចិត្តទៅលើកាសែតរស្មីកម្ពុជាពីសំណាក់អតិថិជនពុំមានការ រង្គោះរង្គើ តាមរយៈការលេចចេញនូវគេហទំព័រព័ត៌មាននោះឡើយ។ ដូច្នេះ នៅក្នុងនាមជាស្ថាប័នព័ត៌មានកាសែតដែលមានបទពិសោធជាង២០ឆ្នាំ កាសែតរស្មីកម្ពុជាក៏នៅតែឈរជើងយ៉ាងរឹងមាំនៅលើទីផ្សារ។
ប្រាកដណាស់បរិបទនៃការចែកចាយព័ត៌មានក្នុងសង្គមខ្មែរនាពេល បច្ចុប្បន្ន នៅតែមិនអាចបោះបង់សារព័ត៌មានក្រដាសក្នុងចំណោមមិត្តអ្នកអាន បើទោះបីជាពួកគេបាននិងកំពុងតែទទួលយកនូវបច្ចេកវិទ្យាថ្មីដែលជា សារព័ត៌មានបែបទំនើប និងរហ័សក៏ដោយ។
បន្ថែមពីលើនេះ លោកមឿន ឈានណារិទ្ធ បានពន្យល់ពីមូលហេតុដែលកាសែតនៅតែមានប្រជាប្រិយភាពដែរថា៖ «យើងអាចយកកាសែតតាមខ្លួននៅគ្រប់ទីកន្លែងទាំងអស់ ហើយបើយើងនិយាយអំពីបញ្ហាជាក់ស្តែងនៅក្នុងប្រទេសកម្ពុជា ប្រព័ន្ធអ៊ីនធឺណិតមិនទាន់ទូលំទូលាយទេ។ ដូច្នេះកាសែតនៅតែមានសារៈសំខាន់សម្រាប់អ្នកអាននៅកម្ពុជាជាពិសេស អ្នកនៅតាមជនបទត្រូវការខ្លាំងណាស់ ព្រោះបច្ចេកវិទ្យានៅមានគម្លាតធំនៅឡើយ»។
ក្នុងនាមជាអ្នកសិក្សាលើផ្នែកសារព័ត៌មានមួយរូប លោក ឈានណារិទ្ធ មានមតិយោបល់ជាចុងក្រោយថា៖ «ម្ចាស់កាសែតទាំងអស់ គួរតែបន្តការបោះពុម្ពជាប្រពៃណីរបស់ខ្លួន កុំឲ្យដូចនិន្នាការនៅលោកខាងលិច ដែលគេហាក់ដូចជាចង់បោះបង់ចោលនូវការបោះពុម្ភជាក្រដាសទៅហើយ។ ប៉ុន្តែសម្រាប់បរិប័ទ្មក្នុងប្រទេសកម្ពុជា យើងនៅតែត្រូវការការបោះពុម្ភជាក្រដាសខ្លាំងមែនទែន។ ហើយអត្ថបទអនឡាញគួរតែមានការផ្ទៀងផ្ទាត់ព័ត៌មានឲ្យបានល្អិតល្អន់ មុននឹងបង្ហោះលើគេហទំព័ររបស់ខ្លួនដើម្បីកុំឲ្យមានការយល់ច្រឡំ»៕
ស្រេង ភារុណ
ប្រភពពី ភ្នំពេញប៉ុស្តិ៍
Facebook
0 Comments:
Post a Comment