នៅពេលគណបក្សប្រជាជនប្រកាសធ្វើរដ្ឋាភិបាលចម្រុះ ជាមួយហ៊្វុនស៊ីនប៉ិច
លោក
នាយករដ្ឋមន្ត្រីហ៊ុន សែន ធ្លាប់បានបញ្ជាក់ថា
ទោះជាគណបក្សហ៊្វុនស៊ិនប៉ិចឈ្នះតែមួយអសនៈក្នុងសភា
ក៏គណបក្សប្រជាជនកម្ពុជានឹងធ្វើរដ្ឋាភិបាលចម្រុះ
ជាមួយគណបក្សហ៊្វុនស៊ិនប៉ិចដែរ។
ក្នុងចំណោមសេចក្តីសម្រេច៨ចំនុច គឺនៅក្នុងចំនុចទី៣ ដែលនិយាយអំពីការគាំទ្រជាឯកច្ឆ័ន្ទរបស់គណបក្សប្រជាជនកម្ពុជា ចំពោះបេក្ខភាពលោក ហ៊ុន សែន ជាបេក្ខជននាយករដ្ឋមន្ត្រីសម្រាប់នីតិកាលទី៥ និងនីតិកាលក្រោយៗទៀតនោះ គណបក្សប្រជាជនកម្ពុជាបានប្រកាសជំហរបន្តគោលការណ៍រៀបចំរាជ រដ្ឋាភិបាលចម្រុះជាមួយគណបក្សហ៊្វុនស៊ីនប៉ិចទៀត។ ប៉ុន្តែថា នៅក្នុងនោះ គណបក្សប្រជាជនកម្ពុជា ក៏បើកចំហរទទួលយកមជ្ឈដ្ឋាននានាផ្សេងទៀត ដែលគណបក្សនេះហៅថា អ្នកស្នហាជាតិផងដែរ។
ហេតុអ្វីគណបក្សប្រជាជនកម្ពុជា នៅប្រកាន់ជំហរយកគណបក្សហ៊្វុនស៊ីនប៉ិចធ្វើជាដៃគូក្នុង រាជរដ្ឋាភិបាលបន្តទៀត? អ្នកនាំពាក្យរបស់គណបក្សប្រជាជនកម្ពុជា លោកខៀវ កាញារីទ្ធ បានប្រាប់វិទ្យុបារាំងអន្តរជាតិ នៅថ្ងៃនេះថា នេះគឺជាការអនុវត្តន៍គោលការណ៍របស់គណបក្សប្រជាជនកម្ពុជា និងគណបក្សហ៊្វុនស៊ីនប៉ិច ដែលមានតាំងពីមុនមក។ អ្នកនាំពាក្យដដែលបន្តថា ការប្តេជ្ញាចិត្តរបស់គណបក្សទាំងពីរនៅតែមានរហូតដល់ពេលនេះ បើទោះជាពេលខ្លះថ្នាក់ដឹកនាំនៃគណបក្សទាំង២មានទំនាស់នឹងគ្នា ខ្លះក៏ដោយ។
ប្រធានប្រតិបត្តិរបស់គណបក្សហ៊្វុនស៊ីនប៉ិច លោកញឹក ប៊ុនឆៃ វិញ បានពន្យល់ថា នេះគឺជាការបន្តស្មារតីនៃការរក្សាស្ថិរភាព សន្តិភាព ដើម្បីការអភិវឌ្ឍន៍ប្រទេស ដែលគណបក្សដៃគូទាំងពីរបានអនុវត្តជាច្រើនឆ្នាំ និងច្រើនអណត្តិមកហើយ។ ហើយថាការរួបរួមគ្នារវាងគណបក្សទាំងពីរនេះ ក៏ជាផ្នែកមួយនៃការការពាររបបរាជានិយមផងដែរ ដោយសារតែគណបក្សហ៊្វុនស៊ិនប៉ិចគឺជាចលនានយោបាយមួយដែលត្រូវបាន បង្កើតឡើងដោយសម្តេចឪ នរោត្តម សីហនុ។
ប្រសិនបើគេសួរថា តើការប្រកាសភាពជាដៃគូជាមួយគណបក្សប្រជាជនកម្ពុជា អាចធ្វើអោយប៉ះពាល់ដល់ប្រជាប្រិយភាពហ៊្វុនស៊ីនប៉ិចដែរឬទេនោះ លោកឧបនាយករដ្ឋមន្ត្រី ញឹក ប៊ុនឆៃ បានឆ្លើយតបថា គណបក្សហ៊្វុនស៊ីនប៉ិចរបស់លោកគិតប្រយោជន៍ជាតិ និងប្រយោជន៍ប្រជារាស្ត្រជាធំ បើទោះជា ពេលខ្លះគណបក្សហ៊្វុនស៊ិនប៉ិចត្រូវរងផលប៉ះពាល់ និងការបាត់បង់ខ្លះក៏ដោយនោះ។ លោកញឹក ប៊ុនឆៃ បញ្ជាក់ថា នេះក៏ជានយោបាយរបស់សម្តេចឪ នរោត្តម សីហនុ ស្ថាបនិកគណបក្សហ៊្វុនស៊ិនប៉ិច ដែលចង់ឃើញការបង្រួបបង្រួម និងការផ្សះផ្សារជាតិជាសំខាន់នោះ។
លោកនាយករដ្ឋមន្ត្រីហ៊ុន សែន ធ្លាប់បានបញ្ជាក់ហើយថា បើទោះជាគណបក្សហ៊្វុនស៊ិនប៉ិចឈ្នះតែមួយអសនៈនៅក្នុងរដ្ឋសភា ក៏គណបក្សប្រជាជនកម្ពុជារបស់លោកនឹងធ្វើរដ្ឋាភិបាលចម្រុះ ជាមួយគណបក្សហ៊្វុនស៊ិនប៉ិចដែរ។
គួរបញ្ជាក់ថា ដោយសារតែការចងសម្ព័ន្ធភាពជាមួយគណបក្សប្រជាជនកម្ពុជានេះ បានជាមន្ត្រីគណបក្សហ៊្វុនស៊ិនប៉ិចខ្លះ អាចមានតំណែងនិងតួនាទីនៅក្នុងរាជរដ្ឋាភិបាលសព្វថ្ងៃនេះ៕RFI
Facebook
0 Comments:
Post a Comment