ចាប់បានឈើគ្រញូងឆ្លងដែនជាង៧ម៉ែត្រគុប

បន្ទាយមានជ័យៈ ឈើគ្រញូងឆ្លងដែនពីប្រទេសថៃ ប្រមាណ ៧ ម៉ែត្រគុប ដែលស្មើនឹង១០៩ ដុំ មានតម្លៃរាប់សែនដុល្លារ ត្រូវបានសមត្ថកិច្ចចម្រុះ ចុះបង្ក្រាបបាន នៅខណៈដែលឈ្មួញ កំពុងលើកដាក់រថយន្តនៅត្រង់ចំណុចច្រករបៀងព្រំដែនបន្ទាយដើម អម្ពិល ស្ថិតក្នុងភូមិភ្នំរូង ឃុំបឹងវែង ស្រុកម៉ាឡៃ កាលពីវេលារំលងអធ្រាត្រយប់ម្សិលមិញ។
លោក សៅ ប៊ុន អធិការស្រុកម៉ាឡៃ បានឲ្យដឹងថា សមត្ថកិច្ចចម្រុះ បានបើកយុទ្ធនាការ ចុះបង្រ្កាបការដឹកឈើនៅម៉ោង ៩យប់ រហូតឈានដល់ម៉ោង១រំលងអធ្រាត្រថ្ងៃពុធម្សិលមិញទើបរឹបអូស ឈើគ្រញូងបានប្រមាណជា ៧ ម៉ែត្រ គុប។
130328_03b

សមត្ថកិច្ចទម្លាក់ឈើគ្រញូងចេញពីឡានពីម្សិលមិញ

ការចុះបង្ក្រាបនេះបន្ទាប់ពីមានការសង្ស័យលើរថយន្តដឹកចុង អង្ករ និងអង្ករដែលដឹកមកពីប្រទេសវៀតណាម ឆ្ពោះទៅប្រទេសថៃ តាមច្រករបៀងបន្ទាយដើមអម្ពិល។
លោកឲ្យដឹងទៀតថា៖ «យើងបានធ្វើការឃាត់ឡានដឹកចុងអង្ករ ក៏បានឃើញឡានដឹកគ្រញូងនៅពីក្រោយ និងមានឈើគ្រញូងជាច្រើនទៀត នៅតាមមាត់អូរនិងក្នុងអូរ។ ឈើនេះគេដឹកពីប្រទេសថៃ យកមកទម្លាក់នៅមាត់អូរ ដើម្បីឲ្យឈ្មួញនៅស្រុកខ្មែរ ដឹកចេញបន្តទៅប្រទេសវៀតណាម។ នៅក្នុងស្រុកម៉ាឡៃនេះ គ្មានឈើគ្រញូងសម្រាប់នាំចេញទៀតទេ»។ ឈើទាំងនោះ ត្រូវបានដឹកយកទៅរក្សាទុក នៅស្នងការនរគបាលខេត្តកាលពីម្សិលមិញ ដើម្បីធ្វើការវាស់វែង។
លោកអែម សុខាអភិបាលស្រុកម៉ាឡៃ បានឲ្យដឹងថា លោកបានចុះសហការជាមួយព្រះរាជអាជ្ញាខេត្តបន្ទាយមានជ័យបន្ទាប់ពី ទទួលព័ត៌មានថា មានឈើជាច្រើន កំពុងត្រូវបានគេជញ្ជូនចេញពីក្នុងអូរ ដាក់លើរថយន្ត Hyundai កង់ ៦ ស្ថិតក្នុងភូមិភ្នំរូង ឃុំបឹងវែង។
លោកឲ្យដឹងទៀតថា៖ «យើងមិនត្រឹមតែរឹបអូសឈើគ្រញូងពីលើរថយន្តនោះទេ យើងក៏បានចុះស្រង់ឈើនៅក្នុងអូរជាច្រើនទៀត។ នេះគឺជាការចុះបង្ក្រាបទ្រង់ទ្រាយធំលើកទី១ ហើយនៅក្នុងស្រុកម៉ាឡៃ បន្ទាប់ពីបទបញ្ជា ០២ របស់សម្តេចនាយករដ្ឋមន្ត្រី»។
នៅក្នុងការចុះបង្ក្រាបនោះ ពុំមានការឃាត់ខ្លួនមនុស្សណាម្នាក់នោះទេ ហើយគេក៏មិនដឹងថា ឈើទាំងនោះ ជាកម្មសិទិ្ធរបស់អ្នកណានោះដែរ ដោយសារតែរថយន្តនោះ ពុំមានស្លាកលេខ។ លោកអែម សុខា បានឲ្យដឹងទៀតថា៖ «បន្ទាប់ធ្វើការរួចរាល់ហើយ យើងនឹងកសាងសំណុំរឿងបញ្ជូនទៅតុលាការ»។
លោកវរសេនីយ៍ឯកយិន ប្រសិទ្ធ ប្រធានការិយាល័យ ប្រឆាំងបទល្មើសសេដ្ឋកិច្ច នៃក្រសួងមហាផ្ទៃ បានថ្លែងថា៖ «ឈើដែលយើងរឹបអូសបានទាំង ១០៩ ដុំនោះ គឺជាប្រភេទដែលល្អបំផុត ខ្ញុំមិនដែលឃើញពីមុនមកទេ។ យើងអាចសន្និដ្ឋានថា ១ ដុំ ប្រហែលជាមានតម្លៃពី ២ ពាន់ ទៅ ៣ ពាន់ដុល្លារ»។
កាលពីថ្ងៃទី ២២ ខែកុម្ភៈ ឆ្នាំ ២០១៣ លោកនាយករដ្ឋមន្ត្រី បានចុះហត្ថលេខាលើបទបញ្ជា ០២ បប ស្តីពីវិធានការបង្ការ ទប់ស្កាត់ និងបង្រ្កាបការកាប់ ការដឹកជញ្ជូន ការប្រមូល ការស្តុកទុក និងការនាំឈើគ្រញូងចេញ ដោយក្នុងចំនុចទី ១ នៃកថាខណ្ឌទី២ បានលើកឡើងថា ករណីមានការឆ្លងដែនខុសច្បាប់ ក្នុងភូមិសាស្ត្រឈរជើងរបស់អង្គភាពណាមួយ មេបញ្ជាការអង្គភាពនោះត្រូវមានការទទួលខុសត្រូវចំពោះមុខ រាជរដ្ឋាភិបាល។ កាលពីខែមករា ឆ្នាំ ២០១០ លោក ហ៊ុន សែន បានដាក់បទបញ្ជាជាលើកទី ១ និងព្រមានខ្លាំងៗ ទៅលើមន្ត្រីយោធាទាំងអស់ ឲ្យបញ្ឈប់សកម្មភាពកាប់ព្រៃឈើ និងបញ្ឈប់សកម្មភាពទន្ទ្រានកាន់កាប់ដី ឬគាំទ្រអ្នករកស៊ីឈើខុសច្បាប់។ ប៉ុន្មានម៉ោងក្រោយបន្ទាប់ពីបទបញ្ជានោះ អាជ្ញាធរខេត្តសៀមរាប បានរកឃើញឈើប្រណីតខុសច្បាប់ប្រមាណ ៤០០ ម៉ែត្រគុប ដែលជាកម្មសិទ្ធិរបស់លោកឧកញ៉ាសុខ គង់ ម្ចាស់ក្រុមហ៊ុនប្រេងសូគីម៉ិច និងទីតាំងមួយទៀត ជារបស់លោកឧកញ៉ា ឡៅ ម៉េងឃីន គឺជាសមាជិកព្រឹទ្ធសភារបស់គណបក្សប្រជាជនកម្ពុជា។
130328_03b

លោក ឈឹម សាវុទ្ធ មន្ត្រីសម្របសម្រួលគម្រោង របស់មជ្ឈមណ្ឌលសិទ្ធិមនុស្សកម្ពុជា បានថ្លែងថា ចំពោះចំណាត់ការរបស់អាជ្ញាធរនោះ វាពុំមានអ្វីដែលប្លែកនោះទេ ហើយនឹងពុំមានប្រសិទ្ធភាពក្នុងការទប់ស្កាត់បទល្មើសកាប់ និងជួញដូរឈើគ្រញូងនោះឡើយ។ លោកថ្លែងថា៖ «បើចង់ទប់ស្កាត់ ឲ្យមានប្រសិទ្ធភាពនោះ គឺត្រូវតែចាប់មេក្លោងរកស៊ីឈើគ្រញូង ឬក៏ឈ្មួញធំៗ យកមកផ្តន្ទាទោសតាមផ្លូវច្បាប់ ពីព្រោះកន្លងមក នៅពេលដែលចាប់បានឈើគ្រញូង គឺចាប់បានតែអ្នកបើករថយន្តស៊ីឈ្នួលគេប៉ុណ្ណោះ ហើយក៏មិនដឹងថា ឈើគ្រញូងទាំងនោះ ត្រូវបានគេយកទៅណានោះដែរ»។

លោកឈឹម សាវុទ្ធ ដែលតែងតែចូលរួមយ៉ាងសកម្ម ជាមួយសហគមន៍ ដើម្បីការពារព្រៃឈើ បានលើកឡើងថា អ្នកដែលរកស៊ីឈើគ្រញូងភាគច្រើនជាមន្ត្រីសមត្ថកិច្ច និងអ្នកមានអំណាច គ្មានប្រជាពលរដ្ឋតូចតាចណា អាចរកស៊ីបានទេ៕

Discussion

Photography

Thursday, March 28, 2013