អ្នក ​​​ជិះ​​ម៉ូតូ​​ធំ​​​ជាង​៤០០​នាក់​មក​ពី​បណ្ដា​ប្រទេស​សមាជិក​អាស៊ាន និង​​​អ្នក​​​ជិះ​​ម៉ូតូ​​ធំ​នៅ​ស្រុក​ខ្មែរ​​ជាង​​១០០​​នាក់​​ផ្សេង​​​ទៀត​ នឹង​មក​ជួប​ជុំ​គ្នា​នៅ​លើ​សួន​ច្បារ​សម្ដេច​ ហ៊ុន សែន ក្នុង​ព្រឹត្តិការណ៍ “២០១៣ ណាហ្គា​វើល​បៃហ្វេសត៍” លើក​ទី​២​ ដែល​​នឹង​ប្រារព្វ​ធ្វើ​​ឡើង​ ចន្លោះ​ពី​ថ្ងៃ​ទី៩ ដល់​​ថ្ងៃ​១២ ខែ​ឧសភា​ ខាង​មុខ​នេះ។
កម្មវិធី​នេះ​គឺ​ជា​ការ​ សហការណ៍​គ្នា​រវាង​​​ក្រសួង​​ទេសចរណ៍​​នៃ​​​ប្រទេស​​​កម្ពុជា និង​សណ្ឋាគារ​ NAGA World។ ក្នុង​​​សន្និសីទ​​សារ​ព័ត៌មាន​​​ដែល​រៀប​ចំ​ធ្វើ​​នៅ​​​​ថ្ងៃ​​មិញ​នេះ បាន​ឲ្យ​ដឹង​​ថា​ សណ្ឋាគារ​ NAGA World ដែល​សហការណ៍​ជា​មួយ​ក្រសួង​ទេសចរណ៍​នៃ​​ប្រទេស​​កម្ពុជា​បាន​សម្រេច​បង្កើត​ ​​​ព្រឹត្តិការណ៍​នេះ​ឡើង​ជា​លើក​ទី​ពីរ​​ បន្ទាប់​ពី​​​ព្រឹត្តិការណ៍​លើក​ទី​ “២០១១​ ណាហ្គា​វើល​បៃហ្វេសត៍”​ ត្រូវ​បាន​ធ្វើ​ឡើង​ដោយ​ជោគ​ជ័យ​ កាល​ពី​​​ខែ​​កក្កដា ឆ្នាំ​២០១១ កន្លង​​ទៅ។
​ក្នុង​​ព្រឹត្តិការណ៍​ “២០១៣ ណាហ្គា​វើល​បៃហ្វេសត៍”​លើក​ទី​២នេះ​ នឹង​មាន​ការ​តាំង​ពិព័រណ៍​ម៉ូតូ និង​សម្លៀក​បំពាក់​អ្នក​ជិះ​ម៉ូតូ​ ដែល​គេ​រំពឹង​ថា​នឹង​អាច​ទាក់​ទាញ​​ភ្ញៀវ​​ចូល​រួម​ទស្សនា​ប្រមាណ ៥០០០០ នាក់។
ចំណែក​​​អ្នក​​ជិះ​ម៉ូតូ​​ធំ​ ដែល​នឹង​មក​ចូល​រួម​ក្នុង​ព្រឹត្តិការណ៍​ខាង​មុខ​នេះ​​វិញ​​ គឺ​​មក​ពី​ប្រទេស​ផ្សេង​ៗ​មាន​​​ដូចជា​ ថៃ, ម៉ាឡេស៊ី, ប្រ៊ុយណេ, ឥណ្ឌូនេស៊ី, និង​វៀតណាម ព្រម​ទាំង​មាន​អ្នក​ជិះ​ម៉ូតូ​មក​ពី​សាកល​លោក​២០​ប្រទេស​បន្ថែម​ទៀត។ សម្រាប់​​អ្នក​ជិះ​ម៉ូតូ​ធំ​ក្នុង​ប្រទេស​កម្ពុជា​វិញ​ ដែល​នឹង​ចូល​រួម​ក្នុង​ព្រឹត្តិការណ៍​នេះ​ដែរ​​ គឺ​មាន​ទាំង​ប្រជា​ជន​ខ្មែរ​ និង​ជន​បរទេស​ដែល​រស់​នៅ​ក្នុង​ស្រុក​ខ្មែរ​។
លោក ពិសិដ្ឋ អ្នក​ជិះម៉ូតូធំ​ក្នុង​ស្រុក
លោក ពិសិដ្ឋ ​​កូន​​ខ្មែរដែល​​និយម​​ជិះ​ម៉ូតូ​ធំ​​ម្នាក់​បាន​ប្រាប់ Sabay ថា លោក​បាន​ត្រៀម​ខ្លួន​រួច​ជា​ស្រេច​ហើយ​​ក្នុង​ការ​ចូល​រួម​ព្រឹត្តិការណ៍​ នេះ។ លោក​បញ្ជាក់​ថា ​ព្រឹត្តិការណ៍​នេះ​មិន​ត្រឹម​តែ​ធ្វើ​ឲ្យ​លោក​​សប្បាយ​ចិត្ត ព្រោះ​បាន​​​​ជួប​អ្នក​ជិះ​ម៉ូតូ​ធំ​មក​ពី​ប្រទេស​ដ៏​ទៃ​នោះ​ទេ ប៉ុន្តែ​​​ថែម​ទាំង​​សប្បាយ​រីក​រាយ​ ព្រោះ​បាន​ចែក​រំលែក​​បទ​ពិសោធន៍​នៃ​ការ​ជិះ​ម៉ូតូ​​ដោយ​​សុវត្ថិភាព​​ជូន​ ប្រជាជន​​ខ្មែរ​បាន​ទស្សនា​ផង​​ដែរ។
ជន ​បរទេស​​និយម​ជិះ​ម៉ូតូ​ធំ​​​ប្រចាំ​កម្ពុជា ដែល​ហៅ​ក្រុម​​ខ្លួន​ថា​ Free Rider Cambodia បាន​ថ្លែង​ថា ព្រឹត្តិការណ៍​ម៉ូតូធំ​លើក​ទី​​២ (២០១៣ ណាហ្គា​វើល​បៃហ្វេសត៍)នេះ​​ពិត​ជា​ល្អ​សម្រាប់​អ្នក​លេង​ម៉ូដ​ម៉ូតូ​ធំ​ទាំង ​អស់​ ព្រោះ​ពួក​គេ​មាន​ឱកាស​បាន​ជួប​អ្នក​ស្រឡាញ់​ម៉ូតូ​ធំ​ដូច​គ្នា ដែល​ធ្វើ​ដំណើរ​លើ​ផ្លូវ​ដ៏​វែង​ឆ្ងាយ​មក​ពី​ប្រទេស​ផ្សេងៗ។ លោក​បន្ត​ថា ​​ឆ្នាំ​មុន​លោក​បាន​ចូល​រួម​​ម្ដង​ហើយ​ ហើយ​ធ្វើ​ឲ្យ​លោក​មិន​អាច​បំ​ភ្លេច​ព្រឹត្តិការណ៍​ដ៏រំភើប​នេះ​បាន​ទេ​ ម្ល៉ោះ​ហើយ​​ឆ្នាំ​នេះ​ លោក​នឹង​មិន​អវត្តមាន​​ជា​ដាច់​ខាត។
ឯកឧត្តម​ ហោ សារុន​ អនុរដ្ឋ​លេខា​ធិកា​ក្រសួង​ទេសចរណ៍ សង្ឃឹម​ថា​ ​ព្រឹត្តិការណ៍ “២០១៣ ណាហ្គា​វើល​បៃហ្វេសត៍” លើក​ទី​២​នេះ​​នឹង​ជួយ​បង្កើន​ចំនួន​ភ្ញៀវ​ទេចរណ៍​​ ដោយសារ​កម្ម​វិធី​នេះ​មាន​ភាព​ទាក់​ទាញ​បំផុត៕


ប្រភពពី សប្បាយ
អត្ថបទ៖ តុង​