ត្រីក្នុងស្ទឹងព្រែកត្នោត ម្តុំខណ្ឌដង្កោ ពុលងាប់អណ្តែតពេញទឹកអ្នកស្រុករើសធ្វើម្ហូប

អ្នកស្រុកនៅព្រែកកំពឹស នាំគ្នាប្រើសំណាញ់ មង ដួសដងយកត្រីដែលងាប់អណ្តែតទឹកទុកធ្វើម្ហូប។ រូបថត ផា លីណា

ភ្នំពេញៈ អ្នកភូមិនិយាយថា ត្រីរាប់រយក្បាលត្រូវបានប្រទះឃើញពុលងាប់អណ្តែតក្នុងទឹកស្ទឹង ព្រែកត្នោត ក្នុងភូមិសាស្ត្រសង្កាត់ព្រែកកំពឹស ខណ្ឌដង្កោ រាជធានីភ្នំពេញ កាលពីព្រឹកថ្ងៃទី៩ មេសាម្សិលមិញនេះ ហើយប្រជាពលរដ្ឋខ្លះបាននាំគ្នាបង់សំណាញ់យក ឯក្មេងតូចៗចុះរើសដាក់កញ្ច្រែងប្រមូលមកទុកធ្វើម្ហូប។
មិនទាន់ មានការបកស្រាយពីត្រីពុលងាប់ បណ្តាលមកពីបញ្ហាអ្វីតែតាមជាក់ស្តែងប្រជាពលរដ្ឋនិងអាជ្ញាធរបាន សង្កេតឃើញមានសារធាតុទឹកស្អុយកខ្វក់ដែលហូរមកពីទំនប់បឹងទំពុន ខណ្ឌមានជ័យ ទម្លាក់មកស្ទឹងព្រែកត្នោត ដែលធ្លាប់តែ មានទឹកថ្លាយង់ និងជាប្រភពទឹកសម្រាប់ស្រោចស្រពដំណាំ និងសត្វពាហនៈ។
អ្នកភូមិ ព្រែកកំពឹស លោក យឹម វុទ្ធី បានប្រាប់ភ្នំពេញ ប៉ុស្តិ៍កាលពីម្សិលមិញថា ទឹកស្ទឹងព្រែកត្នោតមានសភាពល្អក់កករតាំងពីកន្លះខែមុនមកម្ល៉េះ នៅពេលដែលទឹកស្អុយពីបឹងទំពុនបង្ហូរមកកាត់តាមប្រឡាយតូចមួយ ក្បែរ ខាង រួចក៏ចាក់ចូលក្នុងទឹកស្ទឹងព្រែកត្នោតចំពេលដែលមានកម្តៅថ្ងៃ ខ្លាំង ធ្វើឲ្យទឹកស្ទឹងកខ្វក់ ។ ឯទឹកស្អុយចូលទៅធ្វើឲ្យទឹកស្ទឹងនេះប្រែជា ពណ៌ខៀវ និងមានក្លិនមិនល្អ។
លោកបន្តថា៖ «ទឹកស្អុយឡើងពណ៌ខៀវ ប្រហែលកន្លះខែមកហើយ។ ខ្ញុំថាត្រីពុលព្រឹកមិញ ដោយសារតែវារស់នៅក្នុងទឹកស្អុយ ទម្លាក់ពីបឹងទំពុនមក»។
លោក បន្ថែមថា៖ «ពលរដ្ឋនាំគ្នាចុះប្រមូលត្រីងាប់ ខ្លះបង់សំណាញ់ ខ្លះចាប់នឹងដៃ។ ខ្ញុំចាប់បានប្រហែល២ទៅ៣គីឡូដែរ។ ត្រីងាប់នៅទីនោះរាប់រយ មិនដឹងងាប់មកពីណាខ្លះទេ មានត្រីឆ្លាំង ត្រីកញ្ចុះ ត្រីរៀល ជាដើម»។
តែលោក វុទ្ធី មិនប្រាកដថា ត្រីដែលពុលងាប់ដោយសង្ស័យមកពីទឹកកខ្វក់នេះ អាចពិសាបានដោយមិនមានប៉ះពាល់ដល់សុខភាពឬក៏យ៉ាងណាឡើយ ប៉ុន្តែគាត់ថា ពួកអ្នកភូមិបាននាំគ្នាយកត្រីនេះទៅប្រឡាក់។
លោក ជុំ ឈាង ចៅសង្កាត់ព្រែកកំពឹស និយាយថា ពុំមានរោងចក្របង្ហូរសំណល់រាវកខ្វក់អ្វីមកក្នុងស្ទឹងឲ្យខូច បរិស្ថានទេ តែជាទឹកហូរពីបឹងទំពុនមក ហើយដោយសារទឹកស្ទឹងតំបន់នៅជុំវិញគ្មានទឹកហូរមក ដោយកម្តៅថ្ងៃ ក៏មានតែទឹកស្អុយទម្លាក់មកពីបឹងទំពុនច្រើន ទើបបំពុលបរិស្ថានធម្មជាតិក្នុងស្ទឹងព្រែកត្នោតនេះ។
លោកនិយាយ ថា៖ «តាមពិតតំបន់ខ្ញុំនេះជាទឹកស្អាតតាមធម្មជាតិ តែដោយប៉ុន្មានថ្ងៃនេះក្តៅខ្លាំង ហើយលាយនឹងទឹកកខ្វក់ដែលហូរចូលរាល់ថ្ងៃ ធ្វើឲ្យត្រីពុលតែម្តង»។លោកក៏បានរាយការណ៍ទៅថ្នាក់ខណ្ឌ អំពីបញ្ហាត្រីពុលនេះដែរ។

មន្ត្រីបរិស្ថានរាជធានីភ្នំពេញ ម្នាក់ឲ្យដឹងថា មិនទាន់មានមន្ត្រីចុះពិនិត្យលើបញ្ហាត្រីពុលនេះនៅឡើយ។ តែក្នុងលក្ខខណ្ឌអាកាសធាតុក្តៅខ្លាំងដូច្នេះលោកនិយាយថា ត្រីអាចងាប់ដោយសារខ្វះអុកស៊ីសែន។
លោកនិយាយថា៖ «ធ្លាប់មានសកម្មភាពត្រីងាប់ ពេលសីតុណ្ហភាពមានកម្ដៅខ្លាំង និងមានភ្លៀង គឺនៅទន្លេសាបធ្លាប់ងាប់ត្រី ដោយពេលភ្លៀងក្នុងទឹកខ្វះអុកស៊ីសែន ពេលមានសារធាតុពុលកខ្វក់ហូរចូលមក ក៏ងាប់ត្រីតែម្តង»៕ប្រភពពី ភ្នំពេញប៉ុស្តិ៍

Discussion

Photography

Wednesday, April 10, 2013