មហា​សង្ក្រាន្ត​ឆ្នាំ​ម្សាញ់

រូបចម្លាក់ពស់វែកធ្វើពីផ្ដៅ ត្រូវបានរៀបចំធ្វើឡើងដើម្បីអបអរបុណ្យចូលឆ្នាំថ្មីខ្មែរ ឆ្នាំម្សាញ់ដែលនឹងចាប់ផ្ដើមនៅថ្ងៃអាទិត្យ ៤កើត ខែចេត្រ ត្រូវនឹងថ្ងៃទី១៤ មេសា វេលាម៉ោង២:១២នាទី រំលងអ្រធាត្រ។រូបថត ហេង ជីវ័ន

មហាសង្ក្រាន្តឆ្នាំម្សាញ់
ពេលនោះ ព្រះអាទិត្យចេញពីមីនារាសី ទៅស្ថិតនៅមេសារាសី តាមផ្លូវគោវិថី គឺផ្លូវកណ្តាល ទើបមានទេវធីតាមួយព្រះអង្គ ជាមគ្គនាយិកា ព្រះនាម ធុង្សៈទេវី ជាបុត្រីទី១ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌ក្រហម លម្អនូវព្រះកាណ៌ដោយសៀតផ្កាទទឹម អាភរណៈទ្រង់ ពាក់កែវបទុមរាគ ភក្សាហារទ្រង់សោយផ្លែឧទុម្ពរ ព្រះហស្តស្តាំទ្រង់កងចក្រ ព្រះហស្តឆ្វេងទ្រង់ស័ង្ខ ទ្រង់ផ្ទំបិទព្រះនេត្រ លើខ្នងគ្រុឌ (សត្វសសេះ) ជាពាហនៈ។
ថ្ងៃ អាទិត្យ ៤កើត ខែចេត្រ ត្រូវនឹងថ្ងៃទី១៤ មេសា គ្រិស្តសករាជ ២០១៣ វេលាម៉ោង ២:១២នាទី រំលងអាធ្រាត្រ ជាថ្ងៃចូលឆ្នាំម្សាញ់ បញ្ចស័ក។ ថ្ងៃចន្ទ ៥កើត ខែចេត្រ ត្រូវនឹងថ្ងៃទី១៥ ខែមេសា គ្រិស្តសករាជ ២០១៣ ជាវារៈវ័នបត។ លុះថ្ងៃអង្គារ ៦កើត ខែចេត្រ ត្រូវនឹងថ្ងៃទី១៦ ខែមេសា គ្រិស្តសករាជ ២០១៣ នៅវេលាម៉ោង ៥:៥៦នាទី ២៤ វិនាទី ជាវារៈឡើងស័ក គម្រប់ជាសង្ក្រាន្ត៣ថ្ងៃ ស្រេចបរិបូរណ៍ ចូលជាសកលឆ្នាំម្សាញ់ បញ្ចស័ក ចុល្លសករាជ ១៣៧៥ និងមហាសករាជ ១៩៣៥ តទៅ។

រណ្តាប់ទទួលទេវតា
រណ្តាប់ទទួលទេវតាតាមទំនៀមពីបុរាណរៀងរហូតមក ត្រូវរៀបរានទទួលទេវតានៅខាងមុខផ្ទះមួយ សម្រាប់តាំងគ្រឿងពលិការផ្សេងៗ។ ត្រូវរៀបក្រាល សំពត់ពណ៌ស ហើយរៀបចំនូវគ្រឿងសក្ការបូជាទេវតា មានជាអាទិ៍ បាយសី៩ថ្នាក់ចំនួនមួយគូ បាយសី៧ថ្នាក់ មួយគូ បាយសី៥ថ្នាក់ មួយគូ បាយសី៣ថ្នាក់មួយគូ បាយសីប៉ាឆាមមួយគូ ស្លាធម៌មួយគូ ទឹកអប់មួយគូ (ទៀន៥ ធូប៥) លាជ៥ ផ្កា៥ ដាក់លើជើងពានមួយគូ ចេកនួន ចេកណាំវ៉ា ជើងពានមួយគូ ផ្លែឈើ១១មុខ រៀបដាក់ជើងពាន១១គូ ដូងឡៅមួយគូ ទឹកស្អាតពីរកែវ។
ឆ្នាំនេះគួររកផ្លែឧទុម្ពរ ផ្លែល្វាម៉ង់ ដាក់ទទួលទេវតាផង ព្រោះជាភក្សាហាររបស់ទេវធីតា។
ស្រេចហើយនៅវេលាម៉ោងដែលទេវតាចុះមក ត្រូវជួបប្រជុំក្រុមគ្រួសារ ដើម្បីថ្វាយបង្គំព្រះនមស្ការព្រះរតនត្រ័យ សមាទានសីល ហើយតាំងចិត្តឲ្យបានស្អាតបរិសុទ្ធជ្រះស្រឡះនូវមន្ទិលទាំងពួង តម្កល់ចិត្តរំពឹងគិតទៅលើព្រះពុទ្ធ ព្រះធម៌ ព្រះសង្ឃ ជាទីពឹងទីរឭក លុះចប់ពិធីទទួលទេវតា។ភ្នំពេញប៉ុស្តិ៍
ដកស្រង់ពី «មហាសង្ក្រាន្ត ឆ្នាំម្សាញ់ បញ្ចស័ក» ដោយ លោក អ៊ឹម បុរិន្ទ

Discussion

Photography

Friday, April 12, 2013