ទស្សនកិច្ចលោកពូទីននៅអាល្លឺម៉ង់ និងហុល្លង់ស្វាគមន៍ដោយបាតុកម្ម

ក្នុងដំណើរទស្សនកិច្ចរយៈពេលពីរថ្ងៃរបស់លោកពូទីនទៅកាន់ប្រទេស អាល្លឺម៉ង់ និងហុល្លង់ដើម្បីពិភាក្សាពីទំនាក់ទំនងពាណិជ្ជកម្មរបស់រវាង រុស្ស៊ី និងប្រទេសទាំងពីរ បានទទួលស្វាគមន៍ដោយបាតុកម្មប្រឆាំងនឹងរូបលោកទៅវិញ។

ក្នុងជំនួបជាមួយនាយករដ្ឋមន្ត្រីហុល្លង់ Mark Rutte គេសង្កេតឃើញក្រុមសកម្មជនសិទ្ធិជនភេទទី ៣ រាប់រយនាក់ប្រមូលផ្ដុំគ្នានៅក្រៅកន្លែងប្រជុំរបស់ប្រមុខរដ្ឋទាំងពីរដោយលើកបដា និងពាក្យស្លោកប្រឆាំងលោក ពូទីន។

លោក ពូទីន (ស្តាំ) ក្នុងដំណើរទស្សនកិច្ចទៅជួបលោកស្រី Merkel នៅទីក្រុង Hanover

នៅមុននោះបន្តិច ពោលគឺក្នុងដំណើរទស្សនកិច្ចទៅកាន់ប្រទេសអាល្លឺម៉ង់ដើម្បីជួប ជាមួយលោកស្រីអធិការបតី Angela Merkel នាពិព័រណ៍ពាណិជ្ជកម្មធំបំផុតក្នុងលោកក្នុងទីក្រុង Hanover លោក ពូទីន ក៏ត្រូវរំខានដោយសមាជិកក្រុមប្រឆាំងនារីអ៊ុយក្រែនអត់អាវ (Topless) Femen ចំនួនបីនាក់ផងដែរ។ នៅពេលនោះ នារីទាំងបីនាក់បានរត់ចូលសំដៅទៅលោក ពូទីន និងសរសេរអក្សរដាក់នៅលើខ្លួនថា “F*** Dictator” ឬ “ជនផ្ដាច់ការដ៏គម្រក់”។

នៅពេលនោះ លោក ពូទីន បានលើកមេដៃទាំងពីរឡើងជាសញ្ញាឌឺដងថា ធ្វើបានល្អ។ បន្ទាប់ពីនោះ លោក ពូទីនបានថ្លែងនៅក្នុងសន្និសីទសារព័ត៌មានដោយកំប្លែងក្នុងន័យឌឺដង ថា លោកចូលចិត្តការសម្ដែងរបស់ក្រុមបាតុករនារីទាំងបីនាក់។ លើសពីនោះលោក បាននិយាយថែមទៀតថា ”អ្នកគួរ [លោកស្រី Merkel] អរគុណដល់នារីអ៊ុយក្រែនទាំងនោះដែលជួយផ្សព្វផ្សាយពិព័រណ៍នេះ”។

លោក ពូទីន កំពុងពិភាក្សាលើច្បាប់ថ្មីប្រឆាំងនឹងសិទ្ធិភេទទីបី។ បើសិនជាច្បាប់ថ្មីនេះត្រូវអនុម័ត ការផ្សព្វផ្សាយនានាពាក់ព័ន្ធនឹងភេទទីបីគ្រប់រូបភាពនឹងត្រូវ ហាមឃាត់។ ក្រុមសកម្មជនសិទ្ធិជនភេទទី៣ បានលើកឡើងថា មនុស្សភេទទី ៣ ក៏ជាមនុស្ស និងមានសិទ្ធិដូចមនុស្សធម្មតាដែរ៕

លោក ពូទីន ច្បូយមាត់ជាលក្ខណៈឌឺដងចំពោះការប្រឆាំងរបស់ក្រុមនារី Femen

លោក ពូទីន លើកមេដៃទាំងពីរក្នុងន័យឌឺដងថា ធ្វើបានល្អ

ក្រុមបាតុករនារី Femen ត្រូវអង្គរក្សចាប់ខ្លួនកុំឲ្យប្រឆាំង

ប្រែសម្រួល៖ Zac
ប្រភព៖ BBC, Nydaily សប្បាយ

Discussion

Photography

Tuesday, April 9, 2013