សិង្ហបុរីមានចំណាត់ថ្នាក់លើគេនៅអាស៊ាន
ភ្ញៀវទេសចរបរទេសដើរចូលទស្សនាក្នុងទីក្រុងបុរាណថៃមួយនៅក្នុងខេត្តឈៀងម៉ៃ។ រូបថត Bloomberg
របាយការណ៍ស្តីពីភាពប្រកួតប្រជែងការធ្វើដំណើរនិងទេសចរណ៍ សម្រាប់ឆ្នាំ២០១៣របស់វេទិកាសេដ្ឋកិច្ចពិភពលោក បានផ្តល់ចំណាត់ថ្នាក់ប្រទេសសិង្ហបុរីលើបណ្ដាប្រទេសមួយចំនួនទៀត នៅក្នុងតំបន់អាស៊ីអាគ្នេយ៍ហើយផ្តល់ចំណាត់ថ្នាក់ម៉ាឡេស៊ីលើប្រទេស ថៃ។
របាយការណ៍នេះបានសរសើរដល់ឥរិយាបថរាក់ទាក់របស់ប្រជាជនថៃចំពោះ ភ្ញៀវទេសចរបរទេសនិងសកម្មភាពដ៏រឹងមាំរបស់វិស័យឯកជននៅប្រទេសនេះ ក្នុងការបង្កើនវិស័យទេសចរណ៍។ ប៉ុន្តែឧស្សាហកម្មនេះបានជាប់គាំងដោយសារគ្រោះមហន្តរាយធម្មជាតិ ចលាចលនយោបាយការការពារភាពជាកម្មសិទ្ធិលើអចលនទ្រព្យនិងការិយា ធិបតេយ្យក្នុងការចាប់ផ្ដើមពាណិជ្ជកម្មនេះបើតាមរបាយការណ៍ដដែលនេះ ដែលធ្វើឡើងរៀងរាល់ពីរឆ្នាំម្ដង។
ភ្ញៀវទេសចរទៅកាន់ប្រទេសថៃត្រូវបានព្យាករថានឹងមានចំនួន ២៤,៥លាននាក់នៅឆ្នាំនេះគឺកើនឡើងពីចំនួន២២,៣លាននាក់កាលពី ឆ្នាំ២០១២។
នាយកដ្ឋានទេសចរណ៍សង្ឃឹមថានឹងមានភ្ញៀវទេសចរចំនួន៣០លាននាក់មកលេងប្រទេសនេះនៅឆ្នាំ២០១៥។
ប្រទេសថៃបានជាប់ចំណាត់ថ្នាក់លេខ៤៣ នៅក្នុងពិភពលោកដោយបានធ្លាក់ចុះពីរលេខធៀបនឹងការអង្កេតចុងក្រោយ បំផុតកាលពី ឆ្នាំ២០១១។ ថៃក៏ជាប្រទេសមានប្រជាជនច្រើនបំផុតទី៩នៅក្នុងតំបន់អាស៊ី ប៉ាស៊ីហ្វិកដែលនាំមុខសិង្ហបុរី។
របាយការណ៍នេះបានបង្ហាញថា៖ «សិង្ហបុរីបានទទួលផលប្រយោជន៍ពីហេដ្ឋារចនាសម្ព័ន្ធដឹកជញ្ជូនដ៏ ល្អ រួមទាំងការដឹកជញ្ជូនផ្លូវគោកនិងផ្លូវអាកាស»។
ម៉ាឡេស៊ីជាប់ចំណាត់ថ្នាក់ទីពីរនៅក្នុងតំបន់អាស៊ីអាគ្នេយ៍និង ទី៨ នៅក្នុងតំបន់អាស៊ីប៉ាស៊ីហ្វិក ដោយសារតែតម្លៃប្រេងឥន្ធនៈថោកហើយការយកពន្ធលើសំបុត្រយន្តហោះ និងថ្លៃសេវាព្រលានយន្តហោះមានកម្រិតទាប ខណៈដែលតម្លៃសណ្ឋាគារមានលក្ខណៈប្រកួតប្រជែង។
ម៉ាឡេស៊ីបានបើកយុទ្ធនាការទេសចរណ៍ដ៏ជោគជ័យមួយ ដែលមានឈ្មោះថា «Truly Asia» ដើម្បីទាក់ទាញភ្ញៀវទេសចរឲ្យទៅទស្សនាប្រទេសនេះ។
ឥណ្ឌូនេស៊ី ប្រ៊ុយណេ វៀតណាម ហ្វីលីពីន និងកម្ពុជា មានចំណាត់ថ្នាក់ទាបជាងថៃ ខណៈដែលឡាវ និងមីយ៉ាន់ម៉ាមិនត្រូវបានរាប់បញ្ចូលនៅក្នុងរបាយការណ៍នេះទេ៕ ភ្នំពេញប៉ុស្តិ៍PN
Facebook
0 Comments:
Post a Comment