វិបត្ដិផ្លូវចិត្ដដែលមិនព្យាបាលអាចប្រឈមនឹងការធ្វើអត្ដឃាត

អរគុណចំពោះរូបថតសម្ដែងរបស់អ្នកនាង សួន សុជាតា។ រូបថត ម៉ៃ វីរៈ

ករណី ធ្វើអត្តឃាតនៅកម្ពុជាមានការកើនឡើងគួរឲ្យកត់សម្គាល់ក្នុងរយៈ ពេលប៉ុន្មានឆ្នាំចុងក្រោយនេះ។ បើយោងតាមស្ថិតិរបស់ក្រសួងមហាផ្ទៃ បានឲ្យដឹងថាក្នុងឆ្នាំ២០១២មានអំពើអត្ដឃាតរហូតដល់ជិត៦០០ ករណី បើប្រៀបទៅនឹងឆ្នាំ២០១១កើន១៣ភាគរយ។ ជារៀងរាល់ថ្ងៃយ៉ាងហោចណាស់មានចំនួនមនុស្ស ១,៥ នាក់ ជាមធ្យមបានស្លាប់ដោយសារតែអំពើអត្តឃាត។
យោងតាមការធ្វើអង្កេតនិងប្រមូលទិន្នន័យពីសាកលវិទ្យាល័យភូមិន្ទ ភ្នំពេញដឹកនាំដោយលោកស្រី ស៊ី សុខុម ជាប្រធានដេប៉ាតឺម៉ង់ចិត្តវិជ្ជាបានបង្ហាញថានៅប្រទេសកម្ពុជាអត្រា អ្នកធ្វើអត្តឃាតមានចំនួន៤៣នាក់ ក្នុងចំនួនប្រជាជន១០ម៉ឺននាក់នៅក្នុងឆ្នាំ២០១១។
លោក ហឿ សេធុល អ្នកពិគ្រោះយោបល់អំពីបញ្ហាផ្លូវចិត្ដនៅអង្គការផ្ដល់សេវាកម្ម ផ្នែក ចិត្ដសាស្ដ្រក្នុងរាជធានីភ្នំពេញ (Indigo) បានប្រាប់ឲ្យដឹងថា៖ «ការធ្លាក់ទឹកចិត្តជាកត្តាចម្បងមួយដែលឈានទៅរកការសម្លាប់ខ្លួន ឯង»។
ថ្មីៗនេះបណ្ដាញសង្គម Facebook និងសារព័ត៌មាននានាបានចុះផ្សាយ និងបង្ហោះរូបភាពសម្លាប់ខ្លួនដោយសារតែវិបត្ដិផ្សេងៗ។ ជាក់ស្ដែង យុវតីម្នាក់បានយកឡាមអារដៃសម្រក់ឈាម និងលេបថ្នាំជាច្រើនគ្រាប់ដើម្បីសម្លាប់ខ្លួនដែលនាងថតបង្ហោះតាម Facebook ព្រមទាំងយំសោករៀបរាប់អំពីវិបត្ដិស្នេហាដ៏ជូរចត់។
កាសែតកោះសន្តិភាពបានចុះនៅថ្ងៃទី១១ ខែឧសភា ឆ្នាំ២០១៣ដែលមានស្ត្រីម្នាក់ប៉ុនប៉ងសម្លាប់ខ្លួនឯងដោយនាងបាន បាត់បង់ប្តីហើយកូនបំណុលរបស់នាងមិនព្រមសងប្រាក់។ សាច់ញាតិរបស់ស្រ្តីរូបនោះបានប្រាប់ប៉ូលិសថា មុននឹងនាងធ្វើអត្តឃាតនាងបាននិយាយថា តើនាងគួរតែរស់នៅលើលោកនេះប្រឈមនឹងការឈឺចាប់នេះដោយរបៀបណា? សម្ដីអស់សង្ឃឹមនេះមិនធ្វើឲ្យពួកគាត់គិតថា នាងអាចសម្លាប់ខ្លួនឯងនោះទេ។
ហេតុអ្វីបានជាមានករណីធ្វើអត្តឃាតខ្លួនឯងនេះកើតឡើងជាញឹកញាប់នៅប្រទេសកម្ពុជា?
តាមសម្ដីរបស់លោកវេជ្ជបណ្ឌិត ឈឹម សុធារ៉ា ជានាយកប្រតិបត្តិនៅអង្គការចិត្តសង្គមអន្តរវប្បធម៌និងជាអ្នក ឯកទេសផ្នែកជំងឺផ្លូវចិត្តបានឲ្យដឹងថា សុខភាពមានន័យថា ភាពសុខសាន្តទាំងផ្លូវកាយទាំងផ្លូវចិត្តជំនឿ និងសង្គមដែលនៅជុំវិញខ្លួន។ សុខភាពផ្លូវចិត្តគឺជាតុល្យភាពចំពោះអ្វីៗទាំងអស់ដែលនៅជុំវិញ ខ្លួនជាតុល្យភាពដែលថាតើពួកគាត់មានអារម្មណ៍យ៉ាងណាចំពោះខ្លួនឯង ចំពោះអ្នកដទៃនិងតើត្រូវទទួលបាននូវតម្រូវការដើម្បីបំពេញជីវិត រស់នៅប្រចាំថ្ងៃដោយរបៀបណា។
លោកបានបន្តថា៖ «ការឈានដល់អំពើអត្ដឃាតនេះដោយពួកគាត់មានផ្ទុកនូវបញ្ហាផ្លូវ ចិត្ត ដែលកើតមានពីកត្តាបីដូចជាកត្តាជីវសាស្រ្ត (ជាការបម្រែបម្រួលនូវជាតិគីមីនៅក្នុងខួរក្បាលរបស់មនុស្ស) កត្តាចិត្តសាស្រ្ត (ការគិតរបស់បុគ្គល) និងកត្តាសង្គម (បរិស្ថាននៅជុំវិញខ្លួន)»។
លោកវេជ្ជបណ្ឌិត សុធារ៉ា បានបង្ហាញថា អ្វីដែលធ្វើឲ្យប្រជាជនខ្មែរកើតមានបញ្ហានេះច្រើនដោយសារតែ កម្ពុជាជាប្រទេសកំពុងអភិឌ្ឍន៍ហើយជីវភាពប្រជាជននៅមានកម្រិតនៅ ឡើយ។ ដូចនេះពួកគាត់មានការខ្វល់ខ្វាយខ្លាំងទៅលើកត្តាជីវភាពរស់នៅនិង ស្ថានភាពប្រចាំថ្ងៃរបស់ពួកគាត់។
ប្រជាជនមួយចំនួនខ្វះការយល់ដឹងពីបញ្ហាផ្លូវចិត្ដដោយពួកគាត់ នៅមានភាពខ្មាសអៀនមិនហ៊ានទៅរកជំនួយពីអ្នកពិគ្រោះយោបល់និងគ្រូ ពេទ្យចិត្តសាស្រ្តនោះទេដែលអាចជាមូលហេតុនាំពួកគាត់ប្រឈមនឹង បញ្ហាផ្លូវចិត្ដ។
មករាជាស្រ្តីម្នាក់ធ្លាប់ទទួលរងនូវការកើតវិបត្តិផ្លូវចិត្ត នេះដោយសារតែនាងត្រូវប្តីក្បត់ចិត្ដ។ អ្នកនាងបានរៀបរាប់ថា៖ «ខ្ញុំធ្លាប់ប៉ុនប៉ងសម្លាប់ខ្លួនឯងជាច្រើនដងប៉ុន្តែសំណាងល្អ ខ្ញុំមានសាច់ញាតិជួយពន្យល់គាំទ្រនិងមើលថែខ្ញុំហើយទីបំផុត ខ្ញុំក៏បានលែងលះជាមួយនឹងប្តីអាក្រក់ខ្ញុំទៅ»។
អ្នកនាងបានឲ្យដឹងពីមូលហេតុដែលមិនរកសេវាកម្មផ្នែក ចិត្ដសាស្ដ្រថា៖ «ខ្ញុំសម្រេចចិត្តមិនទៅរកសេវាកម្មផ្នែកចិត្តសាស្រ្តពីព្រោះខ្ញុំ គិតថាវាគ្រាន់តែធ្វើឲ្យខ្ជះខ្ជាយលុយនិងពេលវេលាប៉ុណ្ណោះ។ខ្ញុំ ពិតជាខ្លាចអ្នកនៅជុំវិញខ្លួនខ្ញុំថាខ្ញុំជាមនុស្សឆ្កួតហើយ ខ្ញុំពិតជាមិនយល់ថាអ្វីជាការព្យាបាលនោះទេ»។
ចំពោះបញ្ហានេះ លោកវេជ្ជបណ្ឌិត សុធារ៉ា បានបញ្ជាក់ថា ប្រសិនបើអ្នកមានបញ្ហាផ្លូវចិត្តត្រឹមតែ២០ភាគរយពួកគាត់អាច ព្យាបាលដោយខ្លួនឯងដោយគ្រាន់តែសម្រាកលំហែកាយឲ្យបានច្រើននិងមាន ការគាំទ្រពីអ្នកនៅជុំវិញខ្លួន។ ប៉ុន្ដែនៅក្នុងដំណាក់កាលនេះប្រសិនបើពួកគាត់មិនអាចគ្រប់គ្រង ខ្លួនឯងទេវាក៏អាចឈានទៅរកការសម្លាប់ខ្លួនដែរ។ ជំងឺផ្លូវចិត្តដែលកើតច្រើនជាងគេគឺជំងឺធ្លាក់ទឹកចិត្តនិងជំងឺ ថប់បារម្ភដោយសារតែប្រជាពលរដ្ឋខ្មែរនៅមានបញ្ហាច្រើនក្នុង គ្រួសារ និងការងារ។
អារម្មណ៍ខ្មាសអៀនអាចធ្វើឲ្យអ្នកដែលមានបញ្ហាបន្តិចបន្តួច វិវត្ដដល់ដំណាក់កាលធ្ងន់ធ្ងរដោយពួកគាត់សុខចិត្តទទួលទានឱសថ ផ្ដេសផ្តាសពុំមានការណែនាំពីពេទ្យជំនាញផ្នែកចិត្តសាស្រ្តទេ។
ជាងនេះទៅទៀត ពេលខ្លះអ្នកជំងឺមិនហ៊ានឬចាប់អារម្មណ៍ចំពោះខ្លួនឯង។ លោក សេធុល បានលើកឡើងថា អាការសម្គាល់ចំពោះបញ្ហាផ្លូវចិត្តនេះដូចជាគេងមិនលក់មិនសូវ ឃ្លានបាយ ស្រកទម្ងន់ រោគក្រពះ និងអាការជាច្រើនទៀត។ លោកបានស្នើដល់មិត្តភក្ដិនិងគ្រួសារដែលបានប្រទះឃើញនូវអាការអ្នក ជំងឺគួរតែចាប់អារម្មណ៍ពីពួកគាត់និងជួយលើកទឹកចិត្តពួកគាត់ឲ្យ ទៅជួបអ្នកផ្តល់ប្រឹក្សា។
លោក ឈឹម សុធារ៉ា បានលើកឡើងទៀតថា៖ «យើងដឹងថាជំនាញផ្នែកសុខភាពផ្លូវចិត្តតែងតែនៅមានខ្វះចន្លោះ ក្នុងពិភពលោក ហើយកម្ពុជាគឺជាប្រទេសមួយដែលក្មេងខ្ចីចំពោះចំណុចនេះ»។ រីឯលោក សុធារ៉ា និងលោក សេធុល ឯកភាពថា ការយល់ដឹងពីបញ្ហាផ្លូវចិត្ដនេះចំពោះប្រជាជនកម្ពុជាមានការកើន ឡើងជាងមុន។
LIFT សូមសំណូមពរថា ប្រជាពលរដ្ឋគ្រប់រូប និងយុវវ័យគួរតែយល់ដឹងពីបញ្ហានេះឲ្យបានច្រើនហើយត្រូវចេះជួយ លើកទឹកចិត្តដល់អ្នកដែលកើតនូវជំងឺផ្លូវចិត្ដផងជាពិសេសអ្នកដែល ដឹងថាខ្លួនកំពុងតែជួបវិបត្ដិផ្លូវចិត្ដដោយទៅទទួលយកនូវការ ព្យាបាលឲ្យបានត្រឹមត្រូវ ចៀសវាងបញ្ហាមិនល្អកើតឡើង៕ប្រភពពីភ្នំពេញប៉ុស្តិ៍

Discussion

Photography

Friday, May 24, 2013