តុលាការឥណ្ឌា កាត់ទោស ប្រហារជីវិត បុរសអាយុ៥៣ឆ្នាំ ដែលចាប់រំលោភ កុមារអាយុប្រាំឆ្នាំ

ញ៉ូដែលី៖ តុលាការឥណ្ឌា កាលពីថ្ងៃសុក្រ ទី០៧ ខែមិថុនា ឆ្នាំ២០១៣ កន្លងទៅនេះ បានដាក់ទោស បុរស អាយុ៥៣ឆ្នាំម្នាក់ ដែលបានចាប់រំលោភ និងសម្លាប់កុមារី អាយុប្រាំឆ្នាំ នៅភាគខាងលិច នៃរដ្ឋ Maharashtra ប្រទេស ឥណ្ឌាកាលពី ដើមឆ្នាំនេះ។
ទីភ្នាក់ងារសាព័តមាន ចិនស៊ិនហួ ចុះថ្ងៃទី០៨ ខែមិថុនា ឆ្នាំ២០១៣នេះបានឲ្យដឹងថា តុលាការ ក្នុងស្រុក Thane បានចេញដីកា កាត់ទោសប្រហារជីវិត ក្នុងតុលាការ បន្ទាប់ពីការកើតមាន នូវអំពើឧក្រិដ្ឋកម្មដ៏សាហាវយ៉ងឃ្នង ដែលចាត់ទុកជារឿង ដ៏កម្របំផុត ក្នុងចំណោមហេតុការណ៍ ដ៏កម្រនានា។
ឧក្រិដ្ឋជនមានឈ្មោះថា Dattu Ambo Rokade បានល្បួងជនរងគ្រោះ ទៅផ្ទះរបស់ខ្លួន ខណៈពេលនាងកំពុង លេងនៅក្បែរលំនៅដ្ឋានរបស់ខ្លួន ស្របពេលដែលបងប្រុស និងបងស្រីរបស់ខ្លួន កំពុងមើលទូរទស្សន៍ ហើយ ឪពុកម្តាយរបស់នាង កំពុងធ្វើការ។ បន្ទាប់មកលោកបានចាប់រំលោភ និងសម្លាប់នាងដោយការរឹតបំពង់ក ព្រម ទាំងយកទៅបោះចោល ក្នុងគំនរសំរាម។
សាក្សី បានប្រាប់តុលាការថា ពួកគេបានឃើញជនសង្ស័យ ចោលកញ្ចប់មួយ ក្នុងថ្ងៃនោះ។ ហើយសាកសព ក្មេងស្រីម្នាក់ត្រូវបានរកឃើញក្នុងកញ្ចប់នោះ។ គួរបញ្ជាក់ថា ការចាប់រំលោភ បានក្លាយជា បញ្ហាពេញនិយម មួយក្នុងប្រទេស ឥណ្ឌា។
កុមារីអាយុប្រាំឆ្នាំម្នាក់ ត្រូវបានចាប់រំលោភដោយបុរសពីរនាក់ ក្នុងរដ្ឋធានីប្រទេស ឥណ្ឌា។ ការចាប់រំលោភនេះ បានកើតឡើងរយៈពេលមួយអាទិត្យ បន្ទាប់ពីហេតុការណ៍ដ៏រន្ធត់មួយបានកើតឡើង ដោយនិស្សិត អាយុ២៣ឆ្នាំម្នាក់ ត្រូវបានចាប់រំលោភ ដោយបុរសប្រាំមួយនាក់ ក្នុងរថយន្តកំពុងបើកបរ ក្នុងរដ្ឋធានី នៃប្រទេស ឥណ្ឌាដែលបានបំផ្ទុះនូវកំហឹងទូទាំងប្រទេស ដែលជំរុញរដ្ឋាភិបាលឥណ្ឌាចេញ ច្បាប់មួយសម្រាប់រឹតបន្តឹងការចាប់រំលោភចំពោះស្ត្រី ៕ ប្រែសម្រួលៈ ដើមអម្ពិល(DAP)