រដ្ឋសភាអនុម័តច្បាប់ប្រឆាំងការមិនទទួលស្គាល់ឧក្រិដ្ឋកម្មក្នុងរបបខ្មែរក្រហមដោយគ្មានបក្សប្រឆាំង

ធាតុជនរងគ្រោះដោយរបបខ្មែរក្រហមដែលគេតម្កល់ទុកនៅបឹងជើងឯក

រដ្ឋសភាកម្ពុជា នៅព្រឹកនេះ ដែលមានតែសមាជិក៨៦រូបប៉ុណ្ណោះ បានអនុម័តច្បាប់ប្រឆាំងការមិនទទួលស្គាល់ឧក្រិដ្ឋកម្មក្នុងរបប ខ្មែរក្រហម។ ខណៈដែលបក្សប្រឆាំងអះអាងថា ឆាប់រហ័សពេក និងជាលក្ខណៈចំណេញនយោបាយរបស់បក្សកាន់អំណាច។

សេចក្តីស្នើច្បាប់ស្តីពីការប្រឆាំងការមិនទទួលស្គាល់ឧក្រិដ្ឋកម្ម ក្នុងរបបខ្មែរក្រហម ដែលស្នើឡើងដោយលោកនាយករដ្ឋមន្ត្រី ហ៊ុន សែន ត្រូវបានរដ្ឋសភាជាតិដែលមានវត្តមានសមាជិក តែ៨៦រូបបានបោះឆ្នោតអនុម័តទាំងស្រុងហើយ នៅថ្ងៃសុក្រ ទី៧ មិថុនានេះ។

តំណាងរាស្ត្រហត្ថលេខីនៃច្បាប់ប្រឆាំងឧក្រិដ្ឋកម្មខ្មែរក្រហម លោក ជាម យៀប បានថ្លែងថា ច្បាប់នេះ មានគោលដៅចង់ឱ្យពលរដ្ឋចងចាំរបបខ្មែរក្រហម និង ផ្តន្ទាទោសដល់ជនណា ដែលមិនទទួលស្គាល់ ការកាប់សម្លាប់នៃរបបខ្មែរក្រហម គឺជាបទល្មើសព្រហ្មទណ្ឌ។
លោកតំណាងរាស្ត្រគណបក្សប្រជាជាជន បានសង្កត់ធ្ងន់ថា ការមិនទទួលស្គាល់ច្បាប់នេះ គឺជាការប្រមាថយ៉ាងធ្ងន់ធ្ងរដល់វិញ្ញាណក្ខន្ធអ្នកដែលបានបាត់បង់ ជីវិតក្នុងរបបខ្មែរក្រហម។ របបខ្មែរក្រហមដែលបានកាប់សម្លាប់ប្រជាពលរដ្ឋខ្មែរជាង៣លាននាក់ ក្នុងរយៈពេល៣ឆ្នាំ៨ ខែ និង ២០ថ្ងៃ។

ច្បាប់ដែលមានតែ៥មាត្រានេះ គឺនឹងផ្តន្ទាទោសដាក់ពន្ធនាគារពី៦ខែដល់ ២ឆ្នាំ និងផាកពិន័យជាប្រាក់ពី១ លាន ដល់ ៤លានរៀល។

ក្នុងកិច្ចពិភាក្សារយៈពេលជិត២ម៉ោង ស្តីពីច្បាប់នេះដែរ អ្នកនាំពាក្យរដ្ឋសភា លោក ឈាង វុន បានថ្លែងថា ការអនុម័តច្បាប់ស្តីពីការប្រឆាំងមិនទទួលស្គាល់ឧក្រិដ្ឋកម្ម ក្នុងសម័យខ្មែរក្រហមនាពេលនេះ គឺយឺតពេលផង។ យឺតពេលដោយ លោកអះអាងថា ប្រធានស្តីទីគណបក្សសង្គ្រោះជាតិលោក កឹម សុខា បាននិយាយរួចទៅហើយ ថាគ្មានការកាប់សម្លាប់ក្នុងគុកទួលស្លែងនោះ។ តែទោះជាយ៉ាងណា បក្សប្រឆាំង បានអះអាងថាលោក កឹមសុខាដែលគ្រោងនឹងវិលត្រឡប់ពីសហរដ្ឋអាមេរិកនៅថ្ងៃនេះ មិនបាននិយាយថាគុកទូលស្លែងជាគុកសិប្បនិម្មិតនោះទេ។

គួរបញ្ជាក់ថា ការអនុម័តច្បាប់ស្តីការប្រឆាំងការមិនទទួលស្គាល់ឧក្រិដ្ឋកម្មក្នុង របបខ្មែរក្រហម របស់រដ្ឋសភានេះដែរ គណបក្សប្រឆាំងដែលមិនបានចូលរួមអនុម័តច្បាប់ បានស្នើឱ្យរដ្ឋសភាពន្យារពេលអនុម័ត ហើយអះអាងថាច្បាប់នេះ មានលក្ខណៈចំណេញនយោបាយរបស់លោកនាយករដ្ឋមន្ត្រី ហ៊ុន សែន៕
សេចក្តីរាយការណ៍របស់ ស៊ុន មេសា
ប្រភពពី RFI

Discussion

Photography

Friday, June 7, 2013