លោក សម រង្ស៊ី នឹងត្រូវចាប់ខ្លួនភ្លាមៗបន្ទាប់ពីដាក់ជើងជាន់ដីកម្ពុជា

បី ថ្ងៃបន្ទាប់ពីលោក សម រង្ស៊ី (ទណ្ឌិត) ប្រធានគណបក្សសង្គ្រោះជាតិបានចេញមុខប្រកាសជាសាធារណៈថា ខ្លួននឹងវិលត្រឡប់ចូលប្រទេសកម្ពុជាវិញឲ្យបានមុនបោះឆ្នោតនោះ នៅថ្ងៃទី៨ ខែកក្កដានេះ អគ្គស្នងការដ្ឋានគរបាលជាតិតាមរយៈអ្នកនាំពាក្យរបស់ខ្លួន បានប្រកាសបញ្ជាក់ថា ដីការចាប់ខ្លួននឹងត្រូវអនុវត្តភ្លាមៗប្រសិនបើលោក សម រង្ស៊ី មានវត្តមាននៅលើទឹកដីព្រះរាជាណាចក្រកម្ពុជា។
បើតាមការថ្លែងពីលោកឧត្តមសេនីយ៍ឯក គៀត ច័ន្ទថារិទ្ធ ជាមន្ត្រីនាំពាក្យនៃអគ្គស្នងការដ្ឋាននគរបាលជាតិនោះ ការប្រកាសអនុវត្តដីការចាប់ខ្លួនលោក សម រង្ស៊ីនាពេលនេះ គឺធ្វើឡើងបន្ទាប់ពីមានការសាកសួរពីក្រុមអ្នកសារព័ត៌មាន ជាច្រើនទាក់ទងនឹងព័ត៌មានដែលអះអាងថា លោកសម រង្ស៊ី នឹងវិលត្រឡប់មកប្រទេសវិញឲ្យបានមុនថ្ងៃបោះឆ្នោតក្នុងខែកក្កដានេះ ។
លោកឧត្តមសេនីយ៍ឯក គៀត ច័ន្ទថារិទ្ធ បានបញ្ជាក់ប្រាប់គេហទំព័រប៉ូលីសនៅថ្ងៃនេះថា៖ « លោកសម រង្ស៊ី បាននិរទេសខ្លួនដោយខ្លួនឯង ដើម្បីគេចចេញពីការចាប់ខ្លួនក្នុងបទព្រហ្មទណ្ឌ ដូច្នេះការវិលត្រឡប់ចូលក្នុងប្រទេសវិញរបស់លោក សម រង្ស៊ី គឺជាសិទ្ធិរបស់គាត់។ មកទល់បច្ចុប្បន្ននេះមិនដឹងថាគាត់មកឬមិនមកនោះទេ ប៉ុន្តែក្នុងករណីដែលលោក សម រង្ស៊ី ពិត ជាមកមែននោះ នគរបាលជាតិ ដែលជាស្ថាប័នប្រតិបត្តិច្បាប់ គ្មានជម្រើសអ្វីក្រៅពីអនុវត្តដីការបស់តុលាការនោះឡើយ។
លោក សម រង្ស៊ី បាននិរទេសខ្លួនទៅរស់នៅក្រៅប្រទេសតាំងពីអំឡុងឆ្នាំ២០០៩ បន្ទាប់ពីលោកត្រូវបានតុលាការកាត់ទោសឲ្យជាប់ពន្ធនាគារពីបទដកតំរុយ បង្គោលព្រំដែនកម្ពុជា វៀតណាម និងក្លែងឯកសារសាធារណៈ។ ជាមួយគ្នានេះ លោកក៏ធ្លាប់បានប្រកាសជាច្រើនលើកច្រើនសារថានឹងវិលចូលស្រុកវិញ ប៉ុន្តែជាការកត់សំគាល់នោះ គឺលោកមិនដែលបានមកតាមការប្រកាសរបស់ខ្លួននោះឡើយ។
អត្ថបទចុះផ្សាយ ដោយ រ៉េន រតនៈ

Discussion

Photography

Monday, July 8, 2013