អ្នកនាំពាក្យៈ នគរបាលនឹងអនុវត្តដីកាបង្គាប់ឲ្យចាប់ខ្លួនលោកសម រង្ស៊ី

Interior Info- ភ្នំពេញថ្ងៃទី ០៨ ខែកក្កដា ឆ្នាំ២០១៣

ប្រធាន សេនាធិការ និង ជាអ្នកនាំពាក្យនៃ អគ្គស្នងការដ្ឋាននគរបាលជាតិ ឯកឧត្តម ឧត្តមសេនីយ៍ឯក គៀត ច័ន្ទថារិទ្ធ បានថ្លែងថាការអនុវត្តន៍ដីកាក្នុងការចាប់ខ្លួនប្រធានគណបក្យ សង្គ្រោះជាតិលោកសម រង្ស៊ី នឹងត្រូវអនុវត្តភ្លាមបើសិនជាមានវត្តមាននៅក្នុងប្រទេស ។

ការប្រកាស របស់ ឯកឧត្តម ឧត្តមសេនីយ៍ឯក គៀត ច័ន្ទថារិទ្ធ បានធ្វើឡើង បន្ទាប់ពីមានការសាកសួរពី អ្នកសារព័ត៌មាន ជាច្រើនទាក់ទងនឹងព័ត៌មានដែលថា លោកសម រង្ស៊ី អាចនឹងវិត្រឡប់មកប្រទេសវិញ មុនថ្ងៃបោះឆ្នោត នាពេលខាងមុខ ។

ឯកឧត្តម ឧត្តមសេនីយ៍ឯក គៀត ច័ន្ទថារិទ្ធបានបញ្ជាក់ថា៖ “លោកសម រង្ស៊ី បាននីរទេសខ្លួនដោយខ្លួនឯង ដើម្បីគេច ចេញពីការចាប់ខ្លួនក្នុងបទព្រហ្មទណ្ឌ ដូច្នេះការវិលត្រឡប់ចូលក្នុងប្រទេសវិញរបស់លោក សម រង្ស៊ី គឺជាសិទ្ធិរបស់គាត់” ។

ឯកឧត្តម ឧត្តមសេនីយ៍ឯក គៀត ច័ន្ទថារិទ្ធបានបន្តថា៖ “មកទល់បច្ចុប្បន្ននេះមិនដឹងថាគាត់មកឬមិនមកនោះទេ ប៉ុន្តែក្នុងករណីដែលលោក សម រង្ស៊ី ពិត ជាមកមែននោះ នគរបាលជាតិ ដែលជាស្ថាប័នប្រតិបត្តិច្បាប់ គ្មានជម្រើសអ្វីក្រៅពីអនុវត្តដីការបស់តុលាកាឡើយ” ។

គួរបញ្ជាក់ ថាលោក សម រង្ស៊ី បាននិរទេសខ្លួនឯង តាំងពីឆ្នាំ២០០៩មក ហើយលោកក៏ធ្លាប់បានប្រកាសជាច្រើនលើកច្រើនសារថា វិលចូលស្រុកវិញ ប៉ុន្តែមិនដែលបានមក តាមការប្រកាសនោះឡើយ។

លោក សម រង្ស៊ី ត្រូវបានតុលាការផន្ទាទោសឲ្យជាប់ពន្ធនាគារ ១២ឆ្នាំ ដោយសាលក្រម កំបាំងមុខ ក្រោមបទចោទ ការក្លែងបន្លំអក្សរ ក្នុងឯកសារសាធារណៈ និង ការផ្សាយព័ត៌មាន មិនពិត និង សកម្មភាពដកតម្រុយបង្គោលព្រំដែនកម្ពុជា ជាមួយវៀតណាម ៕

(ប្រភព អគ្គស្នងការដ្ឋាននគរបាលជាតិ)

Discussion

Photography

Monday, July 8, 2013