រដ្ឋាភិបាលមិនខ្វល់ខ្វាយចំពោះការកាត់ជំនួយរបស់សហរដ្ឋអាមេរិកទេ

នៅព្រឹកថ្ងៃពុធនេះ រដ្ឋាភិបាលប្រទេសកម្ពុជាបានបញ្ជាក់ហើយថា ខ្លួនមិនខ្វល់ខ្វាយចំពោះការគំរាមរបស់ព្រឹទ្ធសភាសហរដ្ឋអាមេរិក ក្នុងការកាត់ជំនួយមកកម្ពុជានោះទេ។

លោក ហោណាំហុងរដ្ឋមន្រ្តីក្រសួងការបរទេសកម្ពុជា

លោក ហោ ណាំហុង រដ្ឋមន្រ្តីក្រសួងការបរទេសកម្ពុជាបានប្រាប់ក្រុមអ្នករាយការណ៍ ព័ត៌មានបន្ទាប់ពីពិធីចុះហត្ថលេខាទទួលឥណទានពីប្រទេសកូរ៉េខាង ត្បូងថា ការសម្រេចកាត់ជំនួយ ឬយ៉ាងណានោះ គឺជាសិទ្ធិរបស់សហរដ្ឋអាមេរិក, ហើយថា ជោគវាសនាប្រទេសកម្ពុជា គឺស្ថិតនៅក្នុងដៃប្រជាជនកម្ពុជា វាជាសិទ្ធិអធិបតេយ្យ។
ពាក់ព័ន្ធនឹងការទាមទាររបស់ព្រឹទ្ធសភាសហរដ្ឋអាមេរិក ដែលតម្រូវឲ្យលោក សម រង្ស៊ី ប្រធានគណបក្សប្រឆាំង ត្រូវមានវត្តមាននៅក្នុងការបោះឆ្នោតជ្រើសរើសតំណាងរាស្រ្តនីតិកាល ទី៥នាថ្ងៃទី២៨ ខែកក្កដា ខាងមុខ លោក ហោ ណាំហុង បានបញ្ជាក់ថា ពេលលោក សម រង្ស៊ី និរទេសខ្លួនចេញពីប្រទេសកម្ពុជា គឺគ្មានអ្នកណាដេញគាត់ទេ ដូច្នេះការវិលត្រឡប់វិញរបស់លោក សម រង្ស៊ី ក៏គ្មានអ្នកណាឃាត់ដែរ។
សូមបញ្ជាក់ថា នៅថ្ងៃពុធនេះ ព្រឹទ្ធសភាសហរដ្ឋអាមេរិកបានបើកកិច្ចប្រជុំពិភាក្សាមួយស្តីពី ប្រទេសកម្ពុជា ដោយមានការចូលរួមផងដែរពីតំណាងអង្គការសង្គមស៊ីវីលមួយចំនួនពី ប្រទេសកម្ពុជាផងដែរ។ កិច្ចប្រជុំពិភាក្សានោះបានអំពាវនាវដល់រដ្ឋាភិបាលសហរដ្ឋអាមេរិក ឲ្យដាក់សម្ពាធផ្នែកជំនួយមកប្រទេសកម្ពុជា ក្នុងការទាមទារឲ្យរដ្ឋាភិបាលប្រទេសកម្ពុជាធ្វើការកែទម្រង់ការ គោរពសិទ្ធិមនុស្ស និងទាមទារឲ្យលោក សម រង្ស៊ី មេដឹកនាំគណបក្សប្រឆាំងត្រូវតែមានវត្តមាននៅក្នុងការបោះឆ្នោតនា ថ្ងៃទី២៨ ខែកក្កដា ឆ្នាំ២០១៣ខាងមុខ៕ពី www.fpmonline.net

Discussion

Photography

Wednesday, July 10, 2013