អ្នកសង្កេតការណ៍អន្តរជាតិសរសើរការបោះឆ្នោត

អ្នកសង្កេតការណ៍នៅពេលលោក សម រង្ស៊ី វិលត្រឡប់កាលពីថ្ងៃទី១៩ កក្កដា។ រូប វិសាល

ភ្នំពេញៈ អ្នកសង្កេតការណ៍បោះឆ្នោតមកពីប្រទេស ហុងគ្រី បានចេញសេចក្តីថ្លែងការណ៍មួយថា ទឹកថ្នាំជ្រលក់ម្រាមដៃមិនអាចលុបជ្រះ ដូចអ្វីដែលត្រូវបានផ្សព្វផ្សាយនោះទេ ខណៈដែលក្រុមផ្សេងទៀត បានលើកសរសើរដល់ដំណើរការបោះឆ្នោតនៅកម្ពុជាកាលពីថ្ងៃអាទិត្យ។
ការលើកសរសើររបស់ក្រុមអ្នកសង្កេតការណ៍បរទេសទាំងនេះ បានកើតឡើងខណៈដែលគណបក្សប្រឆាំង បានបដិសេធមិនទទួលស្គាល់លទ្ធផលនៃការបោះឆ្នោតដោយទាមទារឲ្យបង្កើត គណៈកម្មការស៊ើបអង្កេតចម្រុះមួយដើម្បីពិនិត្យមើលទៅលើភាពមិន ប្រក្រតី ដែលគណបក្សនេះ លើកឡើងថា បានកើតឡើង ដ៏រីករាលដាលដូចជា ទឹកថ្នាំជ្រលក់ម្រាមដៃត្រូវលុបជ្រះ ឈ្មោះស្ទួនយ៉ាងច្រើននៅលើបញ្ជីបោះឆ្នោត ការបាត់ឈ្មោះប្រជាពលរដ្ឋ ឈ្មោះខ្លះ ត្រូវបានអ្នកផ្សេងបោះជំនួសជាដើម។ល។ ដែលភាពមិនប្រក្រតីទាំងនេះ ក៏ត្រូវបានរកឃើញផងដែរដោយក្រុមអ្នកសង្កេតការណ៍ក្នុងស្រុក ហើយប្រជាពលរដ្ឋបានធ្វើការតវ៉ា នៅតាមមណ្ឌលបោះឆ្នោតជាច្រើន។
សេចក្តីថ្លែងការណ៍មួយពីអ្នកសង្កេតការណ៍ ហុងគ្រី នៅភ្នំពេញសម្រាប់ការបោះឆ្នោតជាតិកាលពីថ្ងៃអាទិត្យបានឲ្យដឹង ថា៖«យើងបាន ចាប់អារម្មណ៍លើសេចក្តីលម្អិត ដូចជា គុណភាពទឹកថ្នាំខ្មៅវាច្បាស់គឺមិនអាចលុបជ្រះទេ»។ នេះជាសេចក្តីថ្លែងការណ៍មួយនៃសេចក្តីថ្លែងការណ៍មួយចំនួនដែលបាន ចុះផ្សាយកាលពីម្សិលមិញ នៅលើគេហទំព័រ របស់អង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្រ្តីដែលគាំទ្រគណបក្ស ប្រជាជន។
ក្រុមមនុស្ស ៥ នាក់មកពីប្រទេស ហុងគ្រី បានកត់សម្គាល់ថា គ្មានអ្វីមិនប្រក្រតីទេ។ «ការបោះឆ្នោតគឺសេរី យុតិ្តធម៌ អាចទទួលយកបាន និងមានតម្លាភាពនេះជាជោគជ័យនៃលទិ្ធប្រជាធិបតេយ្យនៅកម្ពុជា»។
ក្នុងសេចក្តីថ្លែងការណ៍របស់ខ្លួនប្រទេសចិនដែលជាមហាមិត្តរបស់ រដ្ឋាភិបាលកម្ពុជា បានថ្លែងថា ប្រតិភូរបស់ខ្លួន ពុំបានអង្កេតឃើញករណីដែលអាចប៉ះពាល់ធ្ងន់ធ្ងរ ដល់ដំណើរការឬលទ្ធផលនៃការបោះឆ្នោតទេ។
ចំណែកឯកូរ៉េខាងត្បូងបានផ្តល់ការរិះគន់ស្ថាបនាថែមទៀត ក្នុងរបាយការណ៍របស់អ្នកសង្កេតការណ៍របស់ខ្លួនដោយណែនាំឲ្យកម្ពុជា ផ្តោតលើការកែលម្អភាពយុតិ្តធម៌ នៃប្រព័ន្ធផ្សព្វផ្សាយ និងការប្រើប្រាស់ប្រព័ន្ធផ្សព្វផ្សាយសង្គម ហ្វេសប៊ុក និងកែលម្អបញ្ជីឈ្មោះអ្នកបោះឆ្នោត។ កូរ៉េខាងត្បូងបានបន្ថែមថា៖ «ប្រតិភូចង់ស្នើឲ្យមានការបោះឆ្នោត កាន់តែសេរី និងយុតិ្តធម៌ថែមទៀត»។
លិខិតពីលោកស្រី Sheikh Hasina នាយករដ្ឋមន្រ្តី បង់ក្លាដែស ដែលបានចុះផ្សាយលើគេហទំព័ររបស់អង្គភាពព័ត៌មាននិងប្រតិកម្មរហ័សផង ដែរនោះ មិនបានលើកឡើងអំពីដំណើរការបោះឆ្នោតទេ គឺគ្រាន់តែកោតសរសើរលោកនាយករដ្ឋមន្រ្តី ហ៊ុន សែន ប៉ុណ្ណោះ។
លោកស្រីបានសរសេរថា៖ «ខ្ញុំជឿជាក់លើទំនុកចិត្ត និងការជឿជាក់ដែលប្រជាជនកម្ពុជា មានមកលើសម្តេចដែលជាសាក្សីចំពោះការដឹកនាំ និងការបេ្តជ្ញាឆ្ពោះទៅលទិ្ធប្រជាធិបតេយ្យ។ វាជាការជឿជាក់របស់ខ្ញុំ ដែលក្រោមការដឹកនាំរបស់សម្តេច លទិ្ធប្រជាធិបតេយ្យនឹងចាក់ឫសថែមទៀត ក្នុងប្រទេសរបស់សម្តេច ហើយដោយគតិបណ្ឌិត ចំណេះដឹង និងបទពិសោធ ការអភិវឌ្ឍសេដ្ឋកិច្ចកម្ពុជា នឹងឈានដល់គន្លងកាន់តែខ្ពស់»។
ចំណែកឯប្រព័ន្ធផ្សព្វផ្សាយ ឥណ្ឌូនេស៊ី វិញ កាលពីថ្ងៃអាទិត្យ បានដកស្រង់សម្តីលោក Jusuf Kalla អ្នកនយោបាយ ដែលត្រូវបានអញ្ជើញឲ្យទៅចូលរួមជាអ្នកសង្កេតការណ៍បានថ្លែងថា ការបោះឆ្នោតនៅកម្ពុជាដំណើរការទៅយ៉ាងល្អ មានសណ្តាប់ធ្នាប់ ដោយសេរី និងមានសុវត្ថិភាព។
៕ TK ភ្នំពេញប៉ុស្តិ៍

Discussion

Photography

Wednesday, July 31, 2013