លោកឧត្តមសេនីយ៍ទោហ៊ុន ម៉ាណែត បំពេញបេសកកម្មជាលើកទី១លើព្រំដែនសមុទ្រតំបន់កោះពូលូវ៉ៃ និងកោះតាង

ព្រះសីហនុ ៖ ដំណើរបំពេញបេសកកម្មជាលើកទី១ឆ្ពោះទៅកាន់តំបន់ព្រំដែនសមុទ្រ និងការសាកសួរសុខទុក្ខដល់វីរកងទ័ពដែលឈរជើងការពារទឹកដីនៅតាមតំបន់ កោះនានាមានដូចជាកោះពូលូវ៉ៃ កោះតាង កោះរ៉ុង និងកោះរ៉ុងសន្លឹមរបស់ លោកឧត្តមសេនីយ៍ទោ ហ៊ុន ម៉ាណែត នាយរងសេនាធិការចម្រុះ នៃកងយោធពលខេមរភូមិន្ទ មេបញ្ជាការរងកងទ័ពជើងគោក និងជាមេបញ្ជាការ នៃបញ្ជាការដ្ឋានជាតិកម្លាំងពិសេសប្រឆាំងភេរវកម្មតំណាងដ៏ ខ្ពង់ខ្ពស់សម្ដេចតេជោហ៊ុន សែន និងលោកជំទាវកិត្តិព្រឹទ្ធបណ្ឌិត បានដឹកនាំក្រុមកម្លាំងយុវជនមានលោកឧត្តមសេនីយ៍ទោ ម៉ឹង ពន្លក ប្រធានក្រុមចលនាយុវជន១៥៧, ក្រុមយុវជនក្មេងវត្ត និងក្រុមចលនាយុវជនក.៨, ក.១២, ក.២២ និងក្រុមនាយទាហានសកម្ម ប្រមាណជាង៤០០នាក់ ចុះសាកសួរសុខទុក្ខវីរកងទ័ពនិងគ្រួសារកងទ័ពដែលកំពុងឈរជើងនៅតំបន់ សមុទ្រនៃកោះពូលូវ៉ៃ កោះតាង កោះរ៉ុង និងកោះរ៉ុងសន្លឹម។

នាឱកាស បំពេញបេសកកម្មនៅតាមបន្ទាប់ព្រំដែនសមុទ្រ តំបន់កោះទាំងនោះ មានការទទួលស្វាគមន៍យ៉ាងកក់ក្ដៅពីសំណាក់ ឧត្ដមនាវីឯកស្រ៊ុន សារឿន, ឧត្តមនាវីឯក អុក សីហា , ឧត្ដមនាវីឯក ប្រាក់ សុវណ្ណា , ឧត្តមនាវីទោ ទា សុខា និង នាយនាវី ពលនាវី និងគ្រួសារកងទ័ពដែលកំពុងតែឈរជើងការពារអធិបតេយ្យភាពដែនកោះផងដែរ។

តាម របាយការណ៍ដែលថ្លែងប្រាប់គណៈអធិបតី នាឱកាសនោះលោកវរសេនីយ៍ឯក ម៉ម ម៉េត មេបញ្ជាការកងការពារកោះពូលូវ៉ៃលេខ៥ បានថ្លែងថា ទិដ្ឋភាពនៅលើផ្ទៃកោះពូលូវ៉ៃទាំងមូល មានការប្រែកប្រួលអភិវឌ្ឍន៍រីកចម្រើនយ៉ាងខ្លាំងក្លា គួរឲ្យកត់សម្គាល់ បន្ទាប់ពីមានការយកចិត្តទុកដាក់ដ៏ខ្ពង់ខ្ពស់ពីសំណាក់លោកជំទាវកិត្តិ ព្រឹទ្ធបណ្ឌិត ប៊ុន រ៉ានី ហ៊ុន សែន ដែលបានអញ្ជើញមកសួរសុខទុក្ខវីរយុទ្ធជន យុទ្ធនារីកាលពីអំឡុងឆ្នាំ២០០៧ នៅលើកោះពូលូវ៉ៃនេះ។ លោកបានបន្តទៀតថា មូលដ្ឋានកោះពូលូវ៉ៃមួយនេះ ក្លាយជាទីតាំងមួយដ៏រឹងមាំ និងប្រែក្លាយពីតំបន់ខ្វះខាត រហូតមកដល់បច្ចុប្បន្នមានផ្លូវគមនាគមន៍ ទឹក ភ្លើង ជម្រកស្នាក់នៅហេដ្ឋារចនាសម្ព័ន្ធសម្រាប់ផែថ្ម ទូកកប៉ាល់ចូលចត និងបង្កលក្ខណៈងាយស្រួលដល់វីរៈកងទ័ពនិងគ្រួសារកងទ័ពប្រកបដំណាំដាំ ដុះផ្គត់ផ្គង់សេដ្ឋកិច្ចដោយខ្លួនឯងបាន។

លោក ឧត្តមសេនីយ៍ទោ ហ៊ុន ម៉ាណែត តំណាងដ៏ខ្ពង់ខ្ពស់សម្ដេចតេជោ និងលោកជំទាវកិត្តិព្រឹទ្ធបណ្ឌិត បានថ្លែងដោយក្ដីរំភើបរីករាយ ក្នុងដំណើរបេសកកម្មជាលើកទី១របស់លោក នៅលើទឹកដីបន្ទាត់ព្រំដែនតំបន់សមុទ្រ និងតំបន់កោះដែលជាកន្លែងឈរជើងរបស់វីរកងទ័ពខ្មែរប្រចាំការការពារ អធិបតេយ្យភាពនៅលើតំបន់កោះទាំងនេះ។ លោកឧត្តមសេនីយ៍ទោ ក៏បានថ្លែងការសាកសួរសុខទុក្ខដល់បងប្អូនវីរកងទ័ព និងគ្រួសារកងទ័ពពីសំណាក់សម្ដេចតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ជូនចំពោះវីរកងទ័ព និងគ្រួសារកងទ័ពទាំងអស់ ដែលឈរជើងប្រចាំការលើដែនកោះមួយនេះ។ លោកបណ្ឌិតបានថ្លែងទៀតថា សម្ដេចតេជោ និងលោកជំទាវតែងតែមានការនឹករលឹកជានិច្ចជូនចំពោះបងប្អូនវីរកងទ័ព និងគ្រួសារកងទ័ពជាប្រចាំ ហើយឱកាសដ៏ថ្លៃថ្លានេះក្នុងនាមលោកជាតំណាងសម្ដេចតេជោ និងលោកជំទាវកិត្តិព្រឹទ្ធបណ្ឌិតបានដឹកនាំក្រុមយុវជនទាំង៥ក្រុម ចុះសាកសួរសុខទុក្ខក្នុងឱកាសមុនពិធីបុណ្យចូលឆ្នាំថ្មីប្រពៃណីជាតិឈាន មកដល់។ លោកបណ្ឌិតបានគោរពនិងកោតសសើរលើកទឹកចិត្តវីរកងទ័ពដែលឈរជើងការពារ ដែនកោះ និងតំបន់បន្ទាត់ព្រំដែនសមុទ្រមិនឲ្យបាត់បង់មួយមិល្លីម៉ែត្រណា ឡើយ។

ដំណើរ បំពេញបេសកកម្មរបស់គណៈអធិបតីក៏បានបន្តទៅកាន់កោះតាងដែលជាតំបន់កោះ ស្ថិតតាមបណ្ដោយបន្ទាត់ព្រំដែនដែលជាអធិបតេយ្យភាពរបស់កម្ពុជាផងដែរ។ លោកវរសេនីយ៍ឯក យស ស៊ីវុត្ថា មេបញ្ជាការកងការពារកោះតាងលេខ៣ បានរាយការណ៍ជូនគណៈអធិបតីថា ពលនាវី ដែលឈរជើងនៅលើកោះនេះមានការយកចិត្តទុកដាក់ខ្ពស់ក្នុងការដើរល្បាត ត្រួតពិនិត្យ ទាំងលើផ្ទៃទឹក លើផ្ទៃអាកាស ជាប់ជាប្រចាំក្នុងទិសដៅរក្សាការពារសន្តិសុខ សណ្ដាប់ធ្នាប់ នៅលើផ្ទៃកោះទាំងមូលជាពិសេសនៅតំបន់ព្រំដែនទឹកដោយរក្សាការពារ អធិបតេយ្យភាពមិនឲ្យសត្រូវរំលោភបំពានបានមួយមិល្លីម៉ែត្រឡើយ។

លោក ឧត្តមសេនីយ៍ទោ ហ៊ុន ម៉ាណែត បានផ្ដាំផ្ញើដល់វីរកងទ័ពនិងគ្រួសារកងទ័ពទាំងអស់ សូមថែរក្សាសុខភាព រស់នៅស្អាត បរិភោគស្អាត និងមានអនាម័យដើម្បីបន្តការបំពេញភារកិច្ចការពារទឹកដីប្រកបដោយ ភាពជោគជ័យ។

នាឱកាស នោះដែរ លោកឧត្តមសេនីយ៍ទោ ហ៊ុន ម៉ាណែត និងគណៈប្រតិភូ ក៏បានអញ្ជើញកាត់ខ្សែបូ សម្ពោធកំពង់ផែចំនួន២កន្លែងគឺកំពង់ផែនៅកោះពូលូវ៉ៃ និងកំពង់ផែនៅកោះតាង ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត រួមទាំងបាននាំយកនូវអំណោយគ្រឿងឧបភោគបរិភោគ ជូនចំពោះវីរកងទ័ព និងគ្រួសារកងទ័ពឈរជើងនៅលើដែនកោះពូលូវ៉ៃមានដូចជា មីយើង ៥០កេស, ឆៃប៉ូវ ៥០កេស, ប្រហុក ៥០កេស, ថ្នាំពេទ្យ ១០០ប្រអប់, ខោអាវ១០០កំប្លេ, អាវភ្លៀង១០០អាវ, វិទ្យុទាក់ទងខ្នាតធំ ១គ្រឿង, វិទ្យុទាក់ទងខ្នាតតូច១០គ្រឿង, គោយន្ត១គ្រឿង,រទេះរុញ ៦រទេះ, ស៊ីម៉ងត៍ ២០តោន, ចប ២៤, ប៉ែល១២, ដែក គ្រប់ធុន៦តោន ហ្វីប្រូស៊ីម៉ងត៍៥០០សន្លឹក ទុយោទឹកខ្នាត៦០មិល្លីម៉ែត្រ៥០០ដើម និង ថវិកា២០លានរៀល។ ចំណែកឯគ្រឿងឧបភោគបរិភោគដែលត្រូវផ្ដល់ជូនដល់វីរកងទ័ពនៅកោះតាំង មានដូចជា ៖ មីយើង ៥០កេស, ឆៃប៉ូវ ៥០កេស, ប្រហុក ៥០កេស, ថ្នាំពេទ្យ ១០០ប្រអប់, ខោអាវ១០០កំប្លេ, អាវភ្លៀង១០០អាវ, វិទ្យុទាក់ទងខ្នាតធំ ១គ្រឿង, វិទ្យុទាក់ទងខ្នាតតូច១០គ្រឿង, គោយន្ត១គ្រឿង,រទេះរុញ ៦រទេះ, ស៊ីម៉ងត៍ ២០តោន, ចប ២៤, ប៉ែល១២, ម៉ាស៊ីនភ្លើង កម្លាំង១០គីឡូវ៉ាត់មួយគ្រឿង ខ្សែភ្លើងខ្នាត២គុណនឹង៤ ចំនួន៣០ដុំ កុំព្យូទ័រមួយគ្រឿង ម៉ាស៊ីនព្រីនធ័រមួយគ្រឿង និង ថវិកា២០លានរៀល។ ដោយឡែកវីរកងទ័ពដែលអញ្ជើញមកពីកោះរ៉ុង ក៏បានទទួលថវិកា១០លានរៀល និងវីរកងទ័ពអញ្ជើញមកពីកោះរ៉ុងសន្លឹមទទួលបានថវិកា១០លានរៀល រួមទាំងត្រាក់ទ័រមួយគ្រឿងផងដែរ៕

នាគព័ន្ធ

ដោយកម្ពុជាថ្មី

Discussion

Photography

Monday, April 1, 2013