ស្វែងយល់ពីសារធាតុផ្សំនៅក្នុងក្រែមរក្សាសម្ផស្ស

ភ្នំពេញ : តម្រូវការកើនឡើងនូវការថែរក្សាសម្ផស្សដោយពុំវះកាត់ បានជំរុញឲ្យមានការស្រាវជ្រាវជាបន្តបន្ទាប់អំពីរបៀបរបប ដំណើរការវិវឌ្ឍរបស់កោសិកាខូចខាត និងកត្តាជំរុញឲ្យមានការលូតលាស់នូវកោសិកា។
ទោះជាបច្ចុប្បន្នមាន ក្រែមរក្សាសម្ផស្សរាប់រយប្រភេទលេចវត្តមានលើទីផ្សារ ប៉ុន្តែជាក់ស្ដែងមានតែសារធាតុផ្សំប៉ុន្មានមុខប៉ុណ្ណោះ ដែលត្រូវបានការសិក្សាបែបវិទ្យាសាស្ត្រទទួលស្គាល់ពីគុណភាពរបស់វា ពិតប្រាកដ។
១. រ៉េទីណូដ (Retinoids)
រ៉េទីណូដ គឺជាសារធាតុផ្សំដែលពុំអាចខ្វះបាន និងត្រូវបានគេប្រើប្រាស់ យូរលង់ណាស់មកហើយ។ ប្រភេទថ្នាំនេះពុំត្រឹមតែអាចជំរុញឲ្យមានការបំបាត់ចោលកោសិកា ចាស់ៗខាងលើស្បែកប៉ុណ្ណោះទេ វាថែមទាំងអាចធ្វើសកម្មភាពយ៉ាងជ្រៅនៅស្រទាប់ក្រោមស្បែក ដើម្បីជំរុញការបង្កើតនូវស្រទាប់ហ្វីប្រូប្លាស់(Fibroblast) ដ៏មានសារៈសំខាន់ដើម្បីឲ្យស្បែករឹងមាំ ហើយបន្ថយនូវស្នាមជ្រួញតាមអាយុកាល។
ផលវិបាកនៃការប្រើប្រាស់រ៉េទីណូដដែលជាសែស្រឡាយវីតាមីន A នេះរួមមានការរមាស់ ការក្រហមស្បែក ឬងាយប៉ះពាល់ជាមួយពន្លឺព្រះអាទិត្យ។ ហេតុនេះហើយ ការការពារស្បែកដោយក្រែមការពារពន្លឺថ្ងៃមានសារៈសំខាន់ណាស់។
២. អង់ទីអុកស៊ីដង់ (Anti Oxydant)
សារធាតុ រ៉ាឌីកាល់សេរី គឺជាផ្នែកមួយដ៏សកម្មប្រចាំថ្ងៃរបស់យើង។ វាកើតឡើងដោយចលនា ជាពិសេសពេលយើងពិបាកចិត្ត ស្រេ្តស ឬហត់នឿយខ្លាំង។ វាធ្វើឲ្យប៉ះពាល់ដល់ស្បែក និងបំផ្លាញស្រទាប់កោសិកា ធ្វើឲ្យយើងមានផ្ទៃមុខស្រអាប់ ពុំស្រស់ថ្លា។
ការប្រើប្រាស់អង់ទីអុកស៊ីដង់ អាចជួយបំបាត់នូវរ៉ាឌីកាល់សេរីនេះបាន។ អង់ទីអុកស៊ីដង់មានច្រើននៅក្នុងចំណីអាហារ ប៉ុន្តែក្នុងផលិតផលកែសម្ផស្សរួមមាន ពពួកវីតាមីន C និង A ដែលមានប្រសិទ្ធភាពគួរឲ្យកត់សម្គាល់។
៣. ពពួកអាល់ហ្វាអ៊ីដ្រុកស៊ីអាស៊ីត (AHA)
អាស៊ីត AHA ជាប្រភេទអាស៊ីតម្យ៉ាងដែលមានជាពិសេសក្នុងផ្លែឈើ។ តាមបរិមាណកំហាប់របស់វា អាស៊ីតនេះត្រូវបានគេប្រើប្រាស់ក្នុងវិធីថែរក្សាសម្ផស្សដោយពុំ វះកាត់ សម្រាប់សម្អាតផ្ទៃមុខ ហើយយកកោសិកាចាស់ៗចេញ។ នៅក្នុងផលិតផលរក្សាសម្ផស្ស គេប្រើវាក្នុងកម្រិតទាប ដើម្បីធ្វើឲ្យផ្ទៃមុខមានសំណើម។
៤. ហាយដ្រូគីណូន (Hydroquinone)
មូលហេតុ មួយដែលបង្កឲ្យស្បែកឡើងពណ៌ខ្មៅចំពោះបុគ្គលមានវ័យច្រើននោះ គឺបណ្ដាលមកពីការបង្កើតជាតិមេឡានីន។ ការបង្កើតជាពណ៌ខ្មៅនៅលើស្បែកនេះ មានលក្ខណៈកាន់តែធ្ងន់ធ្ងរនៅពេលដែលមានរំញោចពីពន្លឺព្រះអាទិត្យ។
ហាយដ្រូគីណូន ក្នុងកម្រិត២ភាគរយ ឬច្រើនជាងនេះបន្តិចត្រូវបានគេផ្សំ សម្រាប់បន្ថយបញ្ហាជាំខ្មៅដែលបណ្ដាលមកពីពពួកមេឡានីនទាំងនោះ។
៥. អ៊ីយ៉ាលុយរ៉ូនិកអាស៊ីត (Hyaluronic Acid)
វា ជាប្រភេទម៉ូលេគុលតូចៗដែលមានជាប្រចាំនៅក្នុងស្បែករបស់យើង។ ជាមួយលទ្ធភាព រក្សាទឹកប្រមាណ១ពាន់ដងនៃទម្ងន់របស់វា វាអាចធ្វើឲ្យស្បែកមានសំណើម ដោះស្រាយបញ្ហាស្នាមជ្រួញលើផ្ទៃមុខជាដើម។
៦. ប៉ង់តាប៉ិបទីត (Pentapeptides)
វា មានតួនាទីសម្រាប់ជំរុញការបង្កើតកូឡាហ្សែន និងអេឡាស្គីន ដែលចាំបាច់សម្រាប់រក្សាភាពរឹងមាំរបស់ស្បែក។ ជាធម្មតាស្បែកមានលក្ខណៈស្ងួត ជ្រីវជ្រួញទៅតាមអាយុ ដោយសារការបាត់បង់នូវកូឡាហ្សែនក្រោមស្បែក។ ហេតុនេះហើយ ការបញ្ជូលពពួកប៉ង់តាប៉ិបទីតទៅក្នុងផលិតផលរក្សាសម្ផស្ស មានលក្ខណៈចាំបាច់សម្រាប់រក្សាស្បែកមុខឲ្យក្មេងជាងវ័យ។
៧. នីយ៉ាស៊ីណាមីដ (Niacinamide)
ជា ប្រភេទវីតាមីន B ដែលរលាយក្នុងទឹក។ ការសិក្សាបានបង្ហាញពីគុណភាពរបស់វាក្នុងការរក្សានូវប្រព័ន្ធ ការពារនៃផ្នែកខាងលើបំផុតរបស់ស្បែក។ វាមានតួនាទីសម្រាប់ធ្វើឲ្យបញ្ហាខ្មៅដោយសារពន្លឺព្រះអាទិត្យមាន ភាពប្រសើរឡើង តាមរយៈការទប់នូវការបញ្ជូនពណ៌ទៅស្រទាប់ខាងលើបំផុតនៃស្បែក។
៨. អូមេហ្គា៣ (Omega 3)
វា ជាប្រភេទអាស៊ីតខ្លាញ់ មានតួនាទីទប់នូវការប៉ះពាល់ដល់ប្រព័ន្ធការពារស្បែក ដែលជាមូលហេតុធ្វើឲ្យស្បែកខូចខាតវិវឌ្ឍទៅរកភាពចាស់។
៩. សាន់ស្គ្រីន
(Sun Screen) ជាសារធាតុពុំអាចខានបាននៅក្នុងធាតុផ្សំ របស់ផលិតផលរក្សាសម្ផស្ស។ វាអាចស្រូបយកពន្លឺព្រះអាទិត្យ ធ្វើយ៉ាងណាឲ្យពន្លឺប៉ះពាល់ក្នុងកម្រិតល្មមលើស្បែករបស់យើង ដើម្បីកុំឲ្យកោសិកាឆាប់ខូច។

ព័ត៌មានស្ដីពីបញ្ហាសម្ផស្ស សូមទាក់ទងគ្លីនិក Pearl Medical Center តាមរយៈលេខ០៨៨ ៣៣ ៧៧ ៧៧៧ អ៊ីមែល seihachirplast@yahoo.fr និងវិបសាយ www.pearlmedicalcenter.net៕ភ្នំពេញប៉ុស្តិ៍

Discussion

Photography

Monday, April 1, 2013