បញ្ហាមិនគ្រប់លក្ខណៈរបស់កុមារ
កុមារអូទីស្សឹម នាំគ្នាលេងផាត់ពណ៌រូបភាព
នៅមជ្ឈមណ្ឌលគរុកោសល្យភូមិភាគ ហ៊ុន សែន នាខេត្តកណ្ដាល កាលពីថ្ងៃទី២
ខែមេសា ឆ្នាំ២០១៣។
RFA/Leng Maly
អូទីស្សឹម ត្រូវបានអ្នកជំនាញផ្នែកចិត្តវិទ្យា ចាត់ទុកថាជាពិការភាពផ្នែកការអភិវឌ្ឍរបស់កុមារពីកំណើត ដែលតែងតែលេចចេញនូវអាកប្បកិរិយាដដែលៗ និងមានចំណាប់អារម្មណ៍ជាក់លាក់ ចម្លែកខុសពីកុមារដទៃ។ កុមារមានបញ្ហាអូទីស្សឹម មិនចូលរួមលេងសើច ឬមិនចាប់អារម្មណ៍ជាមួយអ្នកដទៃទេ។ សញ្ញានៃបញ្ហានេះ អាចប្រែប្រួលពីស្រាលទៅធ្ងន់ ហើយអាចកត់សម្គាល់បានអាយុរវាង ២ ទៅ ៣ឆ្នាំ។
ការប្រារព្ធទិវាផ្សព្វផ្សាយអូទីស្សឹម ពិភពលោក លើកទី៤ នៅក្នុងឆ្នាំ២០១៣ គឺផ្ដោតលើប្រធានបទ "បង្កើតឱ្យមានភាពវិជ្ជមានដល់កុមារអូទីស្សឹម" ដែលលើការអប់រំសម្រាប់ពួកគេ។
ក្នុងពេលថ្លែងបើកការប្រារព្ធទិវាផ្សព្វផ្សាយនេះ នៅមជ្ឈមណ្ឌលគរុកោសល្យភូមិភាគ ហ៊ុន សែន នាខេត្តកណ្ដាល នៅថ្ងៃទី២ ខែមេសា ប្រធានកម្មវិធីនៃមជ្ឈមណ្ឌលសុខភាពផ្លូវចិត្តកុមារ និងយុវវ័យរបស់អង្គការការីតាស លោកវេជ្ជបណ្ឌិត ប៊ូមី កុមារ (Bhoomi Kumar) ពន្យល់ថា បញ្ហាអូទីស្សឹម មិនមែនជាជំងឺខួរក្បាលវិកលចរិតទេ គឺគ្រាន់តែជាការបាត់បង់ចំណុចខ្លះនៃខួរក្បាល។
លោកវេជ្ជបណ្ឌិត ប៊ូមី កុមារ៖ «ពួកគេមានបញ្ហានៅក្នុងខួរក្បាល ផ្នែកប្រព័ន្ធមួយ ទាក់ទងនឹងការកត់សម្គាល់អារម្មណ៍ ឬក៏មើលមុខអ្នកដែលនៅជុំវិញគេ គឺគេមានបញ្ហាហ្នឹង។ អ៊ីចឹង កុមារអូទីស្សឹម គឺវាអត់ចូលចិត្តមើលមុខអ្នកផ្សេង អ្នកដែលនៅជុំវិញគេទេ ហើយពួកគេរៀនសូត្របាន ស្វែងយល់ច្រើនតាមរយៈរូបភាពជាងប្រើពាក្យសម្ដី»។
លោកមានប្រសាសន៍បន្តថា ការសិក្សាស្រាវជ្រាវនៅសហរដ្ឋអាមេរិក បច្ចុប្បន្ននេះ មានអត្រាកុមារអូទីស្សឹម កាន់តែច្រើនឡើងៗ គឺក្នុងចំណោមកុមារ ៥០នាក់ មានម្នាក់មានបញ្ហាអូទីស្សឹម ដែលពីមុនធ្លាប់មានម្នាក់ក្នុងចំណោម ៣០០នាក់។ នៅប្រទេសកម្ពុជា វិញ មិនទាន់មានតួលេខនៅឡើយទេ៖ «ដោយឡែកនៅក្នុងប្រទេសកម្ពុជា យើង អត់ទាន់មានការស្រាវជ្រាវទាក់ទងពីអត្រាកុមារអូទីស្សឹម ហ្នឹង នៅឡើយទេ។ ប៉ុន្តែមានកុមារជាច្រើនដែលមកព្យាបាលនៅមជ្ឈមណ្ឌលសុខភាពផ្លូវចិត្ត កុមារយើងមានការកើនឡើងដែរ»។
នៅប្រទេសកម្ពុជា បញ្ហានេះហាក់នៅថ្មី ហើយមិនទាន់មានតួលេខនៅឡើយទេ។ លោកបន្តថា ការចូលរួមយកចិត្តទុកដាក់ចំពោះកុមារអូទីស្សឹម ពីគ្រប់មជ្ឈដ្ឋាននៅក្នុងសង្គម ទាំងវិស័យសុខាភិបាល វិស័យអប់រំ ក្រុមគ្រួសារឪពុកម្ដាយ សហគមន៍ អាចជួយដល់កុមារឱ្យមានការចូលរួម និងអភិវឌ្ឍន៍ជីវិតបានលទ្ធផលល្អប្រសើរ។
បើទោះជាបញ្ហានេះជាប្រធានបទថ្មីសម្រាប់ពលរដ្ឋកម្ពុជា ក៏ដោយ ក៏នៅក្នុងពិធីចូលរួមប្រារព្ធទិវាផ្សព្វផ្សាយអូទីស្សឹម ពិភពលោកនេះ មានឪពុកម្ដាយកុមារមានបញ្ហាអូទីស្សឹម មួយចំនួន បានទទួលស្គាល់ថា ការយកចិត្តទុកដាក់ និងការផ្ដល់ការអប់រំពិសេសដល់កុមារទាំងនេះ ពិតជាបានទទួលលទ្ធផលល្អសម្រាប់កូនពួកគាត់មែន ហើយពួកគាត់ទាំងនោះអំពាវនាវឱ្យមានការយកចិត្តទុកដាក់ចំពោះកុមារ អូទីស្សឹម ទាំងនេះ៕ប្រភពពី សំឡេងសហរដ្ឋអាមេរិច (RFA)
Facebook
0 Comments:
Post a Comment