ឯកឧត្ដមទៀ បាញ់៖ ការបាញ់គ្រាប់ពិតនាពេលនេះ គឺជាការពង្រឹងសមត្ថភាពកងទ័ពពេលមានហេតុការណ៍កើតឡើង

ភ្នំពេញ ៖ ឯកឧត្ដមនាយឧត្ដមសេនីយ៍ឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិថ្លែងថា ការបាញ់គ្រាប់ពិត ប្រភេទកាំភ្លើងធំប្រតិកម្មរហ័សធុន BM21 និងកាំភ្លើងធំធុន 130 មិល្លីម៉ែត្រ របស់កងយោធពលខេមរភូមិន្ទ គឺជាការហ្វឹកហ្វឺន ពង្រឹងសមត្ថភាពគុណភាពពេលប្រតិបត្តិរបស់កងទ័ព នៅពេលមានហេតុការណ៍កើតឡើងជាយថាហេតុ។

ឯកឧត្ដមឧបនាយករដ្ឋមន្ត្រីថ្លែងដូច្នេះមកកាន់អ្នកយកព័ត៌មាន បន្ទាប់ពីពិធីបាញ់សាកល្បងកាំភ្លើងធំប្រតិកម្មរហ័ស BM21និងកាំភ្លើងធំធុន130 មិល្លីម៉ែត្រនៅតំបន់ភ្នំម្រះព្រៅ ស្ថិតក្នុងស្រុកភ្នំស្រួច ខេត្តកំពង់ស្ពឺព្រឹកថ្ងៃទី២ ខែមេសា ឆ្នាំ២០១៣។

ឯកឧត្ដម ឧបនាយករដ្ឋមន្ត្រី ទៀ បាញ់ ថ្លែងថា ការបាញ់សាកល្បងនេះបញ្ជាក់អំពីបច្ចេកទេស បច្ចេកវិទ្យាថ្មីមួយចំនួនសម្រាប់កងទ័ពរបស់យើងក្នុងការអនុវត្ត ជាក់ស្ដែង។ ម្យ៉ាងទៀតការបាញ់ជាក់ស្ដែងនេះបានបង្ហាញតាមប្រព័ន្ធកុំព្យូទ័រថា ចំគោលដៅល្អ១០០ភាគរយទាំងBM21 ក៏ដូចកាំភ្លើងធុន130មិល្លីម៉ែត្រ ដូច្នេះអាវុធគ្រាំទ្ររបស់យើងអាចនិយាយបានថា បើមានហេតុការណ៍កើតឡើង យើងត្រូវប្រើប្រាស់វាច្បាស់ណាស់វានឹងឆ្លើយតបតាមតម្រូវការដែលយើង ចង់បានពិតជាមិនខាន។ ឯកឧត្ដមបន្តថា ការចំណាយក្នុងការបាញ់សាកល្បងនេះគឺយើងត្រូវតែចំណាយទោះជាការ ចំណាយនោះវាខ្ពស់ក៏ដោយ ដើម្បីបញ្ជាក់អំពីភាពរឹងមាំក្នុងពេលដែលមានអាសន្នអន្ធក្រកើតឡើង ចំពោះជាតិមាតុភូមិរបស់យើង។

ឯកឧត្ដម ឧបនាយករដ្ឋមន្ត្រី ទៀ បាញ់ គូសបញ្ជាក់ថា ការបាញ់សាកល្បងគ្រាប់ពិតនេះ គឺមិនជាប់ទាក់ទិននឹងការបកស្រាយសាលក្រមតុលាការទីក្រុងឡាអេនោះទេ។ ហេតុផលបកស្រាយរបស់តុលាការ គឺជារឿងរបស់តុលាការទេ យើងគឺបកស្រាយតែបច្ចេកវិទ្យានូវផ្នែកអនុភាពអាវុធរបស់យើងទេ ចំពោះការបកស្រាយរបស់តុលាការវាជារឿងផ្លូវច្បាប់។ បច្ចេកវិទ្យាដែលយើងស្វះស្វែងរកមកបំពាក់ថ្មីយើងត្រូវតែធ្វើការ ហ្វឹកហ្វឺន នៅពេលដែលហ្វឹកហ្វឺនចប់មេរៀនហើយនោះ យើងត្រូវតែយកមកសាកល្បងអនុវត្តជាក់ស្ដែង ដូច្នេះការដែលលើកឡើងថា ជាការបង្ហាញសាច់ដុំនោះវាមិនត្រឹមត្រូវទេ ប៉ុន្តែនេះជាការពិនិត្យប្រសិទ្ធភាពនៃការការពារអធិបតេយ្យបូរណភាព ទឹកដីរបស់យើង។

គួរបញ្ជាក់ដែរថា កន្លងមកក្នុងអំឡុងខែមេសាឆ្នាំ២០១០ កងយោធពលខេមរភូមិន្ទធ្លាប់បានធ្វើលំហាត់បាញ់គ្រាប់ពិតBM21ជាទ្រង់ទ្រាយធំ នៅខេត្តកំពង់ឆ្នាំងម្ដងរួចមកហើយ៕កម្ពុជាថ្មី

Discussion

Photography

Tuesday, April 2, 2013