តុលាការសម្រេចឃុំខ្លួនឧកញ៉ា ឃី គឹមលន់ រឿងផ្ទុះអាវុធ ក្នុងក្បួនឃោសនាគណបក្សសង្គ្រោះជាតិ

ដាក់រូបនេះជំនួសកុំច្រឡំ

ភ្នំពេញ: នៅទីបំផុតតុលាការបានសម្រេចឃុំខ្លួនលោកឧកញ៉ា ឃី គឹមលន់ ជានាយរងការិយាល័យភស្តុភារ នៃកងរាជអាវុធហត្ថលើផ្ទៃប្រទេស ទាក់ទងទៅនឹងរឿងជម្លោះផ្ទុះអាវុធក្នុងក្បួនឃោសនាបោះឆ្នោតគណបក្ស សង្គ្រោះជាតិ កាលពីយប់ថ្ងៃទី៥ ខែកក្កដា ឆ្នាំ២០១៣។

តុលាការបានសម្រេចឃុំខ្លួនលោកឧកញ៉ា ឃី គឹមលន់ នៅល្ងាចថ្ងៃទី៨ ខែកក្កដា ឆ្នាំ២០១៣ បន្ទាប់ពីបានធ្វើការសាកសួរអស់រយៈពេល ២ ថ្ងៃ (៧-៨ កក្កដា) ទាក់ទងការផ្ទុះអាវុធ។

លោក ពូ ដាវី មេបញ្ជាការរងកងរាជអាវុធហត្ថរាជធានីភ្នំពេញ បានឲ្យដឹងថា “តុលាការបានសម្រេចឃុំខ្លួនលោក ឃី គឹមលន់ ដោយសារតែការផ្ទុះអាវុធគ្មានការបញ្ជា ហើយការបាញ់នេះ ដោយសារតែគាត់មានការភ័យខ្លាចមានការប្រើអំពើហិង្សា និងសមាជិកគណបក្ស សង្គ្រោះជាតិ បានចូលទៅក្នុងលំនៅដ្ឋានរបស់គាត់ ខ្លាចមានអំពើហិង្សាក្នុងគ្រួសារ ទើបគាត់សម្រេចចិត្តបាញ់ ដើម្បីការពារខ្លួន និងការពារក្រុមគ្រួសារ និងបាញ់ដើម្បីរារាំងឲ្យកំលាំងសមត្ថកិច្ចដឹងឮ”។ លោក ពូ ដាវី បានបញ្ជាក់ថា “លោក ឃី គឹមលន់ គ្មានបំណងអ្វីបាញ់ទៅលើក្បួនឃោសនាគណបក្ស សង្គ្រោះជាតិ ទេ ហើយកាំភ្លើងដែលគាត់បាញ់មានច្បាប់ត្រឹមត្រូវរបស់គាត់ ប៉ុន្តែគាត់បានផ្ទុះអាវុធគ្មានបទបញ្ជា ហើយអត់មានបញ្ជាណាមួយឲ្យគាត់ទោបាញ់ទេ”៕
ដោយ៖ CEN/មុនីរាជ

Discussion

Photography

Monday, July 8, 2013