ឧត្តមសេនីយ៍ ព្រីចា អឪមស៊ូផាន និង វីរ៉ាផាន ម៉ាឡាយផាន មេដឹកនាំក្រុមនេះ ត្រូវបានអាជ្ញាធរឃាត់នៅពេលពួកគេបានស្នើសុំចូលដោតទង់ជាតិនៅ កូនភ្នំមួយក្នុងតំបន់ ៤,៦ គីឡូម៉ែត្រជិតប្រាសាទព្រះវិហារ។
អ្នកទាំង២បន្ទាប់មកបានប្រគល់ទង់ជាតិទៅអាជ្ញាធរនៅស្រុកកាន់ថា រ៉ាឡាក់នៃខេត្តស៊ី សាកេត និងបានស្នើឲ្យពួកគេដោតទង់ជំនួស។
វរសេនីយ៍ លោកសាន់យ៉ា គៀតសាន មេបញ្ជាការរងនៃកងកម្លាំង Suranaree នៃយោធាតំបន់២ បានសន្យាដោតទង់នៅលើកូនភ្នំតាមសំណើ។
ឧត្តមសេនីយ៍ ព្រីចា សមាជិកស្នូលនៃក្រុមអាវលឿង បាននិយាយថា អ្នកប្រឆាំងតវ៉ាចង់ដោតទង់នៅតំបន់ព្រំដែនដើម្បីជាកាយវិការ និមិត្តរូបមួយបង្ហាញថាតំបន់នេះជារបស់ថៃ។
ពួកអ្នកប្រឆាំងតវ៉ាក្រោយមកបានបំបែកហ្វូងដោយគ្មានអំពើហិង្សាទេ។
បរិយាកាសទូទៅតាមបណ្តោយព្រំដែនជិតប្រាសាទមានសភាពធម្មតាកាលពីថ្ងៃ ម្សិលមិញ ដោយមិនមានរបាយការណ៍ស្តីអំពីការបង្កើនកម្លាំងទ័ពមកពីប្រទេសទាំង ២ទេ។
ស៊ូរិយ៉ា កាតាសិឡា អ្នកសម្របសម្រួលនៃក្រុមនយោបាយបៃតង បានរិះគន់រដ្ឋាភិបាលតាម Facebook ចំពោះការអនុញ្ញាតឲ្យអាជ្ញាធររារាំងមិនឲ្យប្រជាជនចូលក្នុងតំបន់ ជម្លោះដើម្បីដោតទង់។លោកបាននិយាយថា កម្ពុជាអាចឆ្លៀតយកចំណេញពីហេតុការណ៍នេះដើម្បីជួយករណីរបស់ខ្លួន នៅឯតុលាការយុត្តិធម៌អន្តរជាតិ។វាអាចត្រូវបានគេលើកឡើងថា រដ្ឋាភិបាលថៃបានដឹងថាតំបន់នេះជារបស់កម្ពុជា ទើបខ្លួនរារាំងមិនឲ្យប្រជាជនខ្លួនចូល។
លោកបន្តថា ផ្ទុយទៅវិញកម្ពុជាបានលើកទឹកចិត្តប្រជាជនខ្លួនឲ្យមកបង្កើតសហគមន៍ វត្តនិងសាលារៀន ឬសាងសង់ផ្លូវមកកាន់
តំបន់នេះ ដោយគ្មានការប្រឆាំងជំទាស់ពីថៃ។
នៅស្រុកមួយនៃខេត្តណាខន រ៉ាតចាស៊ីម៉ា សមាជិករាប់រយនាក់នៃក្រុមបណ្តាញអ្នកស្នេហាជាតិថៃ បាននិងកំពុងធ្វើការជួបជុំមួយដើម្បីប្រឆាំងនឹងសវនាការរបស់ តុលាការយុត្តិធម៌អន្តរជាតិ។
ឆៃវ៉ាត ស៊ីនស៊ូវង់ មេដឹកនាំនៃក្រុមនេះ បាននិយាយថា ក្រុមរបស់លោកចង់បង្ហាញថាអធិបតេយ្យភាពលើតំបន់ព្រំដែនជុំវិញ ប្រាសាទជារបស់ថៃ និងថាតុលាការ ICJ មិនមានយុត្តាធិការលើតំបន់នេះទេ។
លោកថាថៃបានជំទាស់នឹង សាលក្រមរបស់តុលាការនេះតាំងពីឆ្នាំ១៩៦២ និងបានអំពាវនាវឲ្យរដ្ឋាភិបាលដកខ្លួនចេញពីសវនាការ ពីព្រោះពេលនេះថៃប្រឈមការបាត់បង់តំបន់ព្រំដែន។
ឆៃវ៉ាត បានព្រមានថា បើរដ្ឋាភិបាលមិនដកខ្លួនទេ ក្រុមរបស់លោកនឹងបន្តធ្វើយុទ្ធនាការប្រមូលហត្ថលេខាឲ្យបាន ៥ លានដើម្បីប្រឆាំងនឹងសវនាការនេះ៕ ប្រភពពី CEN
Facebook
0 Comments:
Post a Comment