បើមិនមានការផ្លាស់ប្តូរកាលបរិច្ឆេទ ណាមួយនោះទេ គឺឯកឧត្តម សម រង្ស៊ី ប្រធានគណបក្សសង្គ្រោះជាតិដ៏មានប្រជាប្រិយភាព ដែលកំពុងជាប់រវល់ចូលរួមពិធីរៀបអាពាហ៍ពិពាហ៍កូនស្រីពៅរបស់ឯកឧត្តម នៅឯបរទេសនោះ នឹងធ្វើមាតុភូមិនិវត្តមកកម្ពុជាវិញនៅថ្ងៃទី ១៥ ខែសីហា ឆ្នាំ២០១៣ស្អែកនេះ។
បន្ទាប់ពីមានការបង្ហើបនូវគម្រោងធ្វើ មហាបាតុកម្មប្រឆាំងនឹងលទ្ធផលឆ្នោតដោយថ្នាក់ដឹកនាំគណបក្សប្រឆាំង នាពេលកន្លងមកនោះ ក្រុមអ្នកគាំទ្រគណបក្សសង្គ្រោះជាតិភាគច្រើនមានអារម្មណ៍និងទឹកចិត្ត ពុះពោរត្រៀម និងចូលរួមធ្វើមហាបាតុកម្មយ៉ាងអន្ទះសាក្នុងករណីមានការបើកភ្លើងខៀវ ពីឯកឧត្តម សម រង្ស៊ី ប្រធានគណបក្សប្រឆាំងដ៏ល្បីឈ្មោះ។
ដោយឡែកខាងអាជ្ញាធរមានសមត្ថកិច្ចវិញ ក៏បានត្រៀមជើងការរួចហើយទាំងសម្ភារៈបរិក្ខារ ទាំងកងកម្លាំងប្រដាប់អាវុធគ្រប់ប្រភេទ ទុកទប់ទល់នឹងបង្ក្រាបបាតុកម្មដោយឥតប្រណីដៃ បើមានការកើតឡើងជាយថាហេតុណាមួយ ដើម្បីការពារខ្សែក្រវាត់អំណាច តំណែងនាយករដ្ឋមន្ត្រីអាណត្តិទី៥ ជូនសម្តេចអគ្គមហាសេនាបតីតេជោ ហ៊ុន សែន អនុប្រធានគណបក្សប្រជាជនកម្ពុជា ដ៏មានឥទ្ធិពល។
ព្រឹត្តិការណ៍មួយទៀត គឺនៅរសៀលថ្ងៃទី ១៤ ខែសីហា ឆ្នាំ២០១៣នេះ ព្រះសង្ឃជាច្រើនអង្គ បាននិមន្តជួបជុំធ្វើពិធីបួងសួងសុំឲ្យមានសន្តិភាពនៅរមណីយដ្ឋាន វត្តភ្នំ រាជធានីភ្នំពេញ ដើម្បីបញ្ជៀសកុំឲ្យមានការចល័តទ័ព និងការប្រើអំពើហិង្សាពីសំណាក់អាជ្ញាធរតទៅទៀត។
អ្នកគាំទ្រគណបក្សសង្គ្រោះជាតិទាំងនៅ រាជធានីភ្នំពេញ ទាំងនៅតាមបណ្តាខេត្តនានា ដែលបានផ្តល់បទសម្ភាសន៍បានឲ្យដឹងថា ទោះយ៉ាងណាក៏ដោយពួកគេចង់ឃើញការរៀបចំធ្វើមហាបាតុកម្មប្រឆាំងនឹង លទ្ធផលឆ្នោតដែលឋិតនៅក្រោមវត្តមានរបស់ឯកឧត្តម សម រង្ស៊ី ប្រធានគណបក្សសង្គ្រោះជាតិបានរួមសុខរួមទុក្ខជាមួយគ្នាតស៊ូដើម្បី ស្វែងរកយុត្តិធម៌តាមឆន្ទៈរបស់ប្រជាពលរដ្ឋជាម្ចាស់ឆ្នោត។
មជ្ឈដ្ឋានអ្នកវិភាគព្រឹត្តិការណ៍នយោបាយ នៅកម្ពុជា បានលើកឡើងថា ប្រសិនបើគណបក្សនយោបាយធំៗទាំងពីរ ដែលរំពឹងថា នឹងទទួលបានអាសនៈនៅក្នុងរដ្ឋសភានីតិកាលទី៥ ខាងមុខចូលតុចរចារកដំណោះស្រាយល្អៗជាមួយគ្នា ដើម្បីបម្រើឧត្តមប្រយោជន៍ជាតិ និងប្រជាពលរដ្ឋជាម្ចាស់ឆ្នោតនោះ គឺជាប្រការដ៏ល្អប្រសើរបំផុត ជាងការដឹកនាំ ឬជំរុញឲ្យមានមហាបាតុកម្មប្រឆាំងលទ្ធផលឆ្នោតនាំឲ្យអូសបន្លាយ ពេលវេលានៃភាពជាប់គាំងផ្នែកនយោបាយនៅកម្ពុជា។ នៅមានពេលវេលាច្រើនគួរសមសម្រាប់ថ្នាក់ដឹកនាំគណបក្សនយោបាយធំៗទាំងពីរ សម្រេចក្នុងន័យរក្សានូវសេចក្តីថ្លៃថ្នូរ ទាំងភាគីអ្នកឈ្នះឆ្នោត ទាំងភាគីអ្នកចាញ់ឆ្នោត៕
ពីដើមត្នោត
Facebook
0 Comments:
Post a Comment